দেশৰ কেইবাখনো ৰাজ্যত ১০ খন আসনৰ বাবে অনুষ্ঠিত হোৱা উপনাৰ্বাচনত শেষ হাঁহি মাৰিছে বিজেপিয়ে। ১০ খন আসনৰ ৫ খনেই হস্তগত কৰি বিজেপিয়ে বৃহৎ বিজয়ৰ সোৱাদ লভিবলৈ সক্ষম হৈছে।
নিবনুৱা সমস্যা, অসহিষ্ণুতা, মূল্যবৃদ্ধি, অগ্নিবীৰৰ দৰে বিষয় সমূহক অস্ৰ হিচাবে লৈয়ে উপ নিৰ্বাচনত যেন মুখ থেকেচা খালে বিৰোধীয়ে।
দেশৰ মুঠ ১০ টা উপ-নিৰ্বাচন সমষ্টিৰ ভিতৰত পাঁচখনেই বিজেপিৰ হাতলৈ গৈছে । কংগ্ৰেছে দুখন আসন জিকিছে। আম আদমী পাৰ্টি, শিৰোমণি অকালি দল (অমৃতসৰ) আৰু ৱাইএছআৰ কংগ্ৰেছে এখনকৈ আসন লাভ কৰিছে। যি দুখন ৰাজ্যত জয় লাভ কৰাটো বিজেপিৰ বাবে এক সন্মানৰ বিষয় আছিল, দুয়োখন ৰাজ্যতে গেৰুৱা শিবিৰে জয়লাভ কৰিছে।
উপ-নিৰ্বাচন হোৱা তিনিখন লোকসভা আসন হৈছে উত্তৰ প্ৰদেশৰ ৰামপুৰ আৰু আজমগড়, আৰু পঞ্জাৱৰ চাংৰুৰ। ইফালে, সাতখন বিধানসভা আসন হৈছে দিল্লীৰ ৰাজিন্দৰ নগৰ, ঝাৰখণ্ডৰ মান্দাৰ, অন্ধ্ৰ প্ৰদেশৰ আত্মাকুৰ আৰু ত্ৰিপুৰাৰ আগৰতলা, টাউন বৰদোৱালী, সুৰমা আৰু যুৱৰাজনগৰ।
ত্ৰিপুৰাৰ চাৰিটা বিধানসভা সমষ্টিৰ তিনিটাতে বিজেপিয়ে জয়লাভ কৰিছে। ত্ৰিপুৰাৰ নৱ নিৰ্বাচিত মুখ্যমন্ত্ৰী মানিক সাহাই প্ৰথমবাৰৰ বাবে টাউন বৰদোৱালী সমষ্টিৰ পৰা নিৰ্বাচনত প্ৰতিদ্বন্দিতা কৰিছিল। তেওঁ কংগ্ৰেছৰ আশীষ সাহাক ৬,০০০ তকৈও অধিক ভোটত পৰাজিত কৰিছে।
৩০ বছৰৰ পিছত প্ৰথমবাৰৰ বাবে চিপিএমৰ প্ৰাৰ্থী যুৱৰাজ নগৰত পৰাজিত হৈছে। বিজেপিয়ে ত্ৰিপুৰাৰ সুৰমা সমষ্টিত বৃহৎ ব্যৱধানত জয়ী হৈছে। এই সমষ্টিৰ দ্বিতীয় স্থানত থকা প্ৰাৰ্থীগৰাকী হৈছে কংগ্ৰেছ আৰু টিপ্ৰা মাথা সমৰ্থিত নিৰ্দলীয় প্ৰাৰ্থী। অৱশ্যে ত্ৰিপুৰাত বিজেপিয়ে তিনিখন আসনত সহজ জয় সাৱস্ত্য কৰিলেও আগৰতলা সমষ্টিটো বিজেপি হাতলৈ যোৱাৰ পৰিৱৰ্তে কংগ্ৰেছৰ সুদীপ ৰয়বৰ্মনে সেই সমষ্টিটোত জয়লাভ কৰিছে।
ত্ৰিপুৰাৰ লগতে, উত্তৰ প্ৰদেশতো বিজেপিয়ে ভাল প্ৰদৰ্শন কৰিছে। বিজেপিয়ে অখিলেশ যাদৱৰ দুৰ্গত আঘাত হানি উত্তৰ প্ৰদেশৰ দুয়োখন লোকসভা আসন দখল কৰিছে । এই দুয়োখন আসন সমাজবাদী পাৰ্টিৰ দুৰ্গ হিচাপে পৰিচিত আছিল। সেই দুখন আসনৰ ভিতৰত এখন হৈছে আজমগড় । য’ৰ পৰা ২০১৯ চনত অখিলেশ যাদৱে নিজেই সাংসদ নিৰ্বাচিত হৈছিল। আনজন সাংসদ হৈছে দলটোৰ হেভিৱেট নেতা আজম খান। এই দুয়োখন আসন উপনিৰ্বাচনত বিজেপিৰ হাতলৈ যায়। বিজেপিৰ ঘনশ্যাম সিং সোধি ৰামপুৰৰ পৰা বিজয়ী হোৱাটো নিশ্চিত হৈছে। আজমগড়ত বিজেপিৰ দিনেশ লাল যাদৱ বা ‘নিৰাহুয়া’ ই জয়লাভ কৰাৰ খবৰ আহিছে।
আন উপনিৰ্বাচন বোৰৰ ভিতৰত, আটাইতকৈ অপ্ৰত্যাশিত ফলাফল দেখা গৈছে পঞ্জাৱত। সংগ্ৰাম লোকসভা সমষ্টিত আম আদমী পাৰ্টি পৰাজিত হৈছে।
শিৰোমণি অকালি দলৰ অমৃতসৰৰ প্ৰাৰ্থীয়ে আপৰ প্ৰাৰ্থীক পৰাস্ত কৰি সকলোকে আচৰিত কৰি তুলিছে। বিধানসভা নিৰ্বাচনৰ মাত্ৰ কেইমাহমানৰ ভিতৰতে মুখ্যমন্ত্ৰীৰ কেন্দ্ৰত শাসনব্যৱস্থা হেৰুওৱাটো যথেষ্ট গুৰুত্বপূৰ্ণ।
আম আদমী পাৰ্টীয়ে দিল্লীৰ বাকী তিনিখন আসনত জিকিছে। ঝাৰখণ্ডত, শাসকীয় মিত্ৰজোঁটৰ অংশীদাৰ কংগ্ৰেছ জয়ী হৈছে। অন্ধ্ৰ প্ৰদেশতো ৱাইএছআৰ কংগ্ৰেছ দলে বৃহৎ বিজয় সাৱস্ত্য কৰিছে।
