যোৱা ২৬ জুলাইৰ দিনা সকলোৰে বুকু কঁপাই যোৱা এক ঘটনা।
অসম-মিজো সীমান্তত মিজো আৰক্ষী আৰু দুৰ্বৃত্তৰ গুলিত প্ৰাণ হেৰুৱাইছিল অসম আৰক্ষীৰ ৬ গৰাকীকৈ জোৱানৰ।
গুলিবিদ্ধ হৈ আহত হৈছিল অৰ্ধ শতাধিক অসম আৰক্ষীৰ জোৱানৰ লগতে স্থানীয় লোক।
গুলিবিদ্ধসকলৰ মাজত আছিল প্ৰাক্তন কাছাৰৰ আৰক্ষী অধীক্ষক বৈভৱ চন্দ্রকান্ত নিম্বলকাৰ।
তেওঁ আনকি গুলিয়া-গুলি চলি থকাৰ সময়ত দেহত গুলি লগাৰ পাছতো মিজো আৰক্ষীক ‘ফায়াৰিঙ’ বন্ধ কৰিবলৈ বাৰম্বাৰ অনুৰোধ জনোৱাৰ লগতে অসম আৰক্ষীয়ে গুলি চলোৱা নাই বুলি বাৰেপতি কৈ আছিল।
বিতৰ্কিত আন্তঃৰাজ্যিক সীমান্তত মিজোৰামৰ আৰক্ষী বাহিনীৰ গুলিত বিষয়াজন আহত হয় আৰু তেওঁক বিমানেৰে মুম্বাইলৈ নিয়া হয় আৰু আন্ধেৰীৰ কোকিলাবেন আম্বানী চিকিৎসালয়ত অস্ত্ৰোপচাৰ কৰা হয়।
তেওঁৰ কঁকাল আৰু শৰীৰৰ তলৰ অংশত গুলিয়ে বেছিভাগ আঘাত কৰিছিল তথা কোনো গুৰুত্বপূৰ্ণ অঙ্গ গুৰুতৰভাৱে ক্ষতিগ্ৰস্ত হোৱা নাছিল।
তিনিঘন্টা ধৰা অস্ত্ৰোপচাৰৰ পাছত চিকিৎসকে তেওঁৰ দেহৰ পৰা পাঁচটাকৈ গুলি বাহিৰ কৰিবলৈ সক্ষম হৈছিল।
এতিয়া ক্ৰমান্বয়ে সুস্থিৰ হৈ উঠিছে বৈভৱ নিম্বলকাৰ। চিকিৎসালয়ৰ বিচনাৰ পৰা মুখত এমুকুৰা হাঁহি লৈ উঠা এখন ফটো ইতিমধ্যে ছ’চিয়েল মিডিয়াত ভাইৰেল হৈছে।
উক্ত ফটোখন ফেচবুকত আপলোড কৰি ১৩ নং লক্ষীপুৰ সমষ্টিৰ বিধায়ক কৌশিক ৰায়ে লিখিছে ‘মুম্বাইত চিকিৎসাধীন হৈ থকা প্ৰাক্তন কাছাৰ এছপি নিম্বলকাৰ বৈভৱ চন্দ্ৰকান্ত আইপিএছে চিকিৎসাৰ প্ৰতি ভালদৰে সঁহাৰি জনাইছে আৰু তেওঁৰ স্বাস্থ্য এতিয়া সুস্থিৰ হৈ আছে বুলি জানি অতি আনন্দিত হৈছো। আপোনাৰ মুখৰ হাঁহিটো অসমৰ জনসাধাৰণৰ বাবে এক ডাঙৰ সকাহ। সমগ্ৰ অসমে আপোনাৰ দ্ৰুত আৰোগ্যৰ বাবে প্ৰাৰ্থনা কৰি আছে। সোনকালে ঘূৰি আহক।‘
নিম্বালকাৰ ২০০৯ বৰ্ষৰ আইপিএছ আৰু অসমৰ কাছাৰৰ প্ৰাক্তন আৰক্ষী অধীক্ষক। তেওঁ বিবাহিত আৰু তেওঁৰ এগৰাকী তিনি বছৰীয়া কন্যাসন্তান আছে যি এতিয়াও অসমত আছে।
