দেশত যক্ষ্মা ৰোগক লৈ পুনৰ উদ্বেগ বৃদ্ধি পাইছে। স্বাস্থ্য মন্ত্ৰালয়ৰ তথ্য অনুসৰি বিগত কেইমাহমানত পশ্চিম বংগকে ধৰি দেশৰ বিভিন্ন ৰাজ্যত যক্ষ্মা ৰোগীৰ সংখ্যা বৃদ্ধি পাইছে। ৰোগ নিৰ্ণয় নোহোৱা ৰোগীৰ সংখ্যাও কম নহয়। যি আনলৈও এই সংক্ৰমণ বিয়পাইছে। গতিকে যক্ষ্মা ৰোগৰ পৰা হাত সাৰিবলৈ সজাগ হোৱাটো বাঞ্ছনীয়। বিভিন্ন স্থানত সজাগতা শিবিৰৰো আয়োজন কৰা হৈছে। সাধাৰণতে শৰীৰৰ ৰোগ প্ৰতিৰোধ ক্ষমতা দুৰ্বল হ’লে বা দীৰ্ঘদিনীয়া ৰোগ হ’লে যক্ষ্মা ৰোগৰ আশংকা বৃদ্ধি পায়। এই ক্ষেত্ৰত ডায়েবেটিছ ৰোগীসকলৰো আক্ৰান্ত হোৱাৰ আশাংকা বাঢ়িছে।
বিশ্ব স্বাস্থ্য সংস্থা (WHO)ৰ এক প্ৰতিবেদনত কোৱা হৈছে যে ভাৰতত প্ৰতি তিনি মিনিটৰ মূৰে মূৰে প্ৰায় দুজন যক্ষ্মা ৰোগীৰ মৃত্যু হয়। পৰিষ্কাৰ-পৰিচ্ছন্নতাৰ অভাৱ, পুষ্টিহীনতা আৰু বিভিন্ন দীৰ্ঘদিনীয়া ৰোগৰ বাবেই যক্ষ্মা ৰোগীৰ মৃত্যু হৈছে। ডায়েবেটিছ, এইডছ, কেন্সাৰৰ কেমোথেৰাপি লোৱা ৰোগীৰো এই ৰোগ হোৱাৰ আশংকা থাকে বুলি উল্লেখ কৰিছে। গতিকে যদি আপুনি যক্ষ্মা ৰোগত আক্ৰান্ত হয় তেন্তে ই অতি সোনকালে বিয়পিব পাৰে।
যক্ষ্মা ৰোগৰ পৰা হাত সাৰিবলৈ যিমান পাৰি সোনকালে টিকা লোৱাটো অতি প্ৰয়োজনীয়। এইমছৰ পালমোন’লজিষ্ট সন্দীপ কাদিয়ানে ইনচুলিন গ্ৰহণ কৰিবলগীয়া ডায়েবেটিছ ৰোগীক বিচিজি টিকাকৰণৰ পৰামৰ্শ দিয়ে। এই ভেকচিনে যক্ষ্মা ৰোগৰ বেক্টেৰিয়া প্ৰতিৰোধ কৰিব পাৰে বুলি উল্লেখ কৰিছে।
ডাঃ অৰুণাংশু তালুকদাৰৰ মতে উপযুক্ত পুষ্টিৰ দ্বাৰা যিকোনো ধৰণৰ যক্ষ্মা ৰোগৰ সম্ভাৱনা প্ৰায় ৪০ শতাংশ হ্ৰাস পাব পাৰে। তেওঁৰ মতে ডায়েবেটিছ ৰোগত আক্ৰান্ত হ’লে সকলো খাদ্য খাব নোৱাৰিব, কিন্তু শাক-পাচলি আৰু প্ৰ’টিন সমৃদ্ধ খাদ্য বেছিকৈ খাব লাগে বুলি উল্লেখ কৰিছে। শাক-পাচলিৰ প্ৰটিন যেনে বিভিন্ন দালি, বীন আৰু সৰিয়হ দৈনন্দিন খাদ্য তালিকাত অন্তৰ্ভুক্ত কৰিব লাগে আৰু আঁহযুক্ত শাক-পাচলি খাব লাগে বুলি উল্লেখ কৰিছে।
উল্লেখ্য যে পৰিষ্কাৰ-পৰিচ্ছন্ন হৈ থকাটো অতি প্ৰয়োজনীয়। হাঁচি বা কাহ হ’লে মুখখন ঢাকি ৰাখিব লাগে। বাহিৰলৈ ওলাই যাওঁতে মাস্ক পৰিধান কৰাটো প্ৰয়োজনীয়। আৱদ্ধ ঠাইত থাকিব নালাগে। মুকলি, বায়ুমণ্ডলীয় ঠাইত থাকিব লাগে। ঘৰৰ কাৰোবাৰ চৰ্দি বা এলাৰ্জী হ’লে তেওঁলোকে ব্যৱহাৰ কৰা বস্তুৰ পৰা আঁতৰি থাকিব লাগে। আক্ৰান্ত ব্যক্তিৰ লগত খাদ্য ভাগ কৰিব নালাগে। পানীৰ বটলটোও পৃথকে ৰাখিব লাগে বুলি চিকিৎসকে পৰামৰ্শ কৰিছে।
