মাস্কে ক’ৰ’না ভাইৰাছ প্ৰতিৰোধ কৰিব পাৰেনে? প্ৰতিৰোধৰ বাবে আপুনি কি কৰা উচিত?
মাস্কে সঁচাই মাহামাৰী ক’ৰ’না ভাইৰাছ প্ৰতিৰোধ কৰে নে? কোনোবাই ব্যৱসায়িক লাভালাভৰ বাবে আতংক বিয়পাইছে নেকি?
সমগ্ৰ বিশ্বতে মহামাৰী ৰূপ ধাৰণ কৰা ক’ৰ’না ভাইৰাছে ভাৰতবৰ্ষতো আতংকৰ সৃষ্টি কৰা দেখা গৈছে।
ভাৰতৰ বিভিন্ন চহৰত এই মাৰাত্মক ভাইৰাছত আক্ৰান্ত ব্যক্তিক চিনাক্ত কৰি চিকিৎসা চলাই থকা হৈছে।
দেশত ক’ৰ’না ভাইৰাছত আক্ৰান্ত ব্যক্তিক চিনাক্ত কৰাৰ লগে লগে কিছু উৰা বাতৰিয়ে জনসাধাৰণক আতংকিত কৰাও দেখা গৈছে।
কিছুৱে ব্যৱসায়িক লাভালাভৰ বাবেও তেনে কৰিছে নেকি? তাকলৈও প্ৰশ্ন উত্থাপন হোৱা দেখা গৈছে।
ইতিমধ্যে বজাৰত মাস্কৰ চাহিদা অভূতপূৰ্বভাৱে বৃদ্ধি পাইছে। N95 আৰু N99 মাস্কৰ দাম ফাৰ্মাচিবোৰত কেইবাগুণো বৃদ্ধি পোৱা পৰিলক্ষিত হৈছে। যাৰ দাম ৫০০ টকা পৰ্যন্ত বৃদ্ধি পাইছে।
আনকি দোকানত এই দুইবিধ মাস্ক উপলব্ধ নোহোৱাত মানুহৰ মাজত আতংকৰ সৃষ্টি হোৱা দেখা গৈছে।
অনলাইন শ্ব’পিং চাইট অমাজন, ফ্লিপকাৰ্ট, বিগ বাস্কেট আদিতো মাস্কৰ নাটনি হোৱা দেখা গৈছে।
প্ৰতিৰোধৰ বাবে প্ৰাথমিক কৰ্তব্য হৈছে সঘনাই হাত ধোৱা, ঘৰ-কোঠা আদি সঘনাই পৰিষ্কাৰ পৰিচ্ছন্ন কৰি ৰখাহে।
বিশেষজ্ঞৰ মতে এই ভাইৰাছত আক্ৰান্ত ব্যক্তিয়ে মাস্ক পিন্ধাটো অধিক জৰুৰী। যাতে তেওঁৰ পৰা আন লোক সংক্ৰমিত নহয়।
কেন্দ্ৰীয় স্বাস্থ্য মন্ত্ৰী ডাঃ হৰ্ষ বৰ্ধনে কৈছে যে, মাস্ককলৈ যিধৰণৰ উৰা বাতৰি সৃষ্টি হৈছে সেয়া উচিত হোৱা নাই। এই ধৰণৰ আতংক সৃষ্টি কৰি মুনাফা লাভৰ চেষ্টা কৰা বিক্ৰেটাসকলৰ কেন্দ্ৰীয় চৰকাৰে কঠোৰ ব্যৱস্থা গ্ৰহণ কৰিব বুলিও কেন্দ্ৰীয় স্বাস্থ্য মন্ত্ৰীগৰাকীয়ে সকিয়াই দিছে।