অসমতাপূৰ্ণ সম্পত্তিৰ গোচৰত গ্ৰেপ্তাৰ হৈছে পঞ্জাৱ আৰক্ষীৰ এগৰাকী প্ৰাক্তন মহিলা কনিষ্টবল। সোমবাৰে আৰক্ষীয়ে গ্ৰেপ্তাৰ কৰে প্ৰাক্তন মহিলা কনিষ্টবল অমনদীপ কৌৰক। একে সময়তে তেওঁৰ সম্পত্তি জব্দ কৰা হৈছে।
এই কনিষ্টবলগৰাকীৰ বিৰুদ্ধে পূৰ্বেও ড্ৰাগছৰ চক্ৰৰ সৈতে জড়িত থকাৰ অভিযোগ উত্থাপন হৈছিল। ইয়াৰ পিছতে অমনদীপক চাকৰিৰ পৰা বৰ্খাস্ত কৰা হৈছিল। এইবাৰ তেওঁক অসমতাপূৰ্ণ সম্পত্তিৰ গোচৰত গ্ৰেপ্তাৰ কৰা হৈছে।
আৰক্ষীৰ সূত্ৰ অনুসৰি অমনদীপৰ কেৱল কেইবাখনো বিলাসী গাড়ী আৰু বাইকেই নহয়, ভাটিণ্ডাত তেওঁ ১ কোটি টকাৰে এটা ঘৰো নিৰ্মাণ কৰিছে।
কেৱল সেয়াই নহয়, অমনদীপে ১৯ লাখ টকাত দামী ঘড়ী, মেকআপ কিট আৰু মাটিও ক্ৰয় কৰিছিল। স্বাভাৱিকতে এজন পুলিচ কনিষ্টবলৰ ইমান টকা কেনেকৈ হ’ল, সেই লৈ সন্দেহৰ সৃষ্টি হৈছে৷ সেয়ে ৰাজ্যৰ নিচাবিৰধী ফ’ৰ্চে তেওঁক গ্ৰেপ্তাৰ কৰে।
সূত্ৰৰ পৰা জানিব পৰা মতে অমনদীপৰ মহিন্দ্ৰা কোম্পানীৰ থাৰ, ৰয়েল এনফিল্ড বাইক, দুটা আইফোন, আৰু লাখ লাখ টকাৰ ৰলেক্স ঘড়ী আছে। ইয়াৰ বাহিৰেও অমনদীপৰ বেংক একাউণ্টত ১ লাখতকৈও বেছি টকা আছে। এইগৰাকী প্ৰাক্তন আৰক্ষীৰ পৰা কি কি জব্দ কৰা হৈছিল তাৰো তালিকা প্ৰস্তুত কৰিছে আৰক্ষীয়ে। জানিব পৰা মতে, অমনদীপৰ ভটিণ্ডাৰ দুটা প্লটৰ মাটিৰ মালিক৷ এটাৰ মূল্য ৯৯ লাখ, আনটোৰ ১৮ লাখ ১২ হাজাৰ।আৰক্ষী কনিষ্টবল হিচাপে কাম কৰাৰ উপৰিও ছ’চিয়েল মিডিয়াতো তেওঁৰ জনপ্ৰিয়তা আছিল। তেওঁৰ ইনষ্টাগ্ৰাম প্ৰফাইলৰ নাম – Insta Queen। তথ্য অনুসৰি ২০১৮ চনৰ পৰা ২০২৪ চনলৈ অমনদীপৰ মুঠ আয় আছিল ১ কোটিৰ অলপ বেছি। কিন্তু একে সময়তে তেওঁ ১৩ কোটিৰো অধিক খৰচ কৰিছিল! উল্লেখ্য যে যোৱা মাহত নাৰ্কটিকছ বিভাগে তেওঁৰ ঘৰৰ পৰা ১৭ গ্ৰাম ড্ৰাগছ উদ্ধাৰ কৰিছিল।
