বিশ্বই কৰ’না ভাইৰাছৰ সৈতে যুঁজি থকাৰ সময়ত দেশত কঠোৰ লকডাউন চলি আছিল। ঠিক সেই সময়তে ১৪ জুনৰ পুৱা এটা দুখৰ সংবাদ আহিল। অভিনেতা সুশান্ত সিং ৰাজপুতৰ মৃত্যুৰ খবৰ। বান্দ্ৰা ফ্লেটত ওলমি থকা অৱস্থাত উদ্ধাৰ হয় তেওঁৰ মৃতদেহ। প্ৰথমতে এই খবৰটো বিশ্বাস কৰিবলৈ টান হৈছিল যদিও পিছলৈ প্ৰশ্ন উত্থাপন হ’ল, সুশান্তই আত্মহত্যা কৰিলে নে কোনোবাই তেওঁক হত্যা কৰিলে? সমগ্ৰ দেশতে তোলপাৰ লাগে।
চিবিআইৰ তদন্তৰ দাবী কৰিছিল সুশান্তৰ পৰিয়ালৰ লগতে তেওঁৰ অগণন অনুৰাগীয়ে। তাৰ পিছত তদন্ত আৰম্ভ হ’ল। প্ৰায় চাৰে চাৰি বছৰৰ মূৰত সুশান্তৰ মৃত্যুৰ ৰহস্য সমাধানৰ ক্ষেত্ৰত চিবিআইয়ে চূড়ান্ত প্ৰতিবেদন দাখিল কৰিছে।
২০২০ চনৰ ১৪ জুনত বান্দ্ৰা ফ্লেটৰ পৰা সুশান্তৰ ওলমি থকা মৃতদেহ উদ্ধাৰ হয়। আৰম্ভণিতে তেওঁৰ প্ৰেমিকা অভিনেত্ৰী ৰিয়া চক্ৰৱৰ্তীৰ নাম আহি পৰে। তেওঁৰ বিৰুদ্ধে ড্ৰাগছ যোগান ধৰা, মানসিক নিৰ্যাতন, ধনৰ বাবে হেঁচা দিয়া, ক’লা যাদু আদিৰ অভিযোগ আছিল।
সুশান্তৰ পৰিয়ালে পোনপটীয়াকৈ তেওঁৰ আত্মহত্যাৰ বাবে উচটনি দিয়াৰ অভিযোগ উত্থাপন কৰে। ২০২০ চনৰ আগষ্ট মাহত বিহাৰ আৰক্ষীৰ পৰা চিবিআইয়ে তদন্তৰ দায়িত্ব লয়। চাৰি বছৰীয়া তদন্তৰ অন্তত চিবিআইয়ে দাখিল কৰিছে সুশান্তৰ মৃত্যুৰ ঘটনাৰ ক্ল’জাৰ ৰি’পৰ্ট।
সূত্ৰ অনুসৰি চিবিআইৰ প্ৰতিবেদনে আত্মহত্যাৰ তত্ত্বকে সমৰ্থন কৰিছে। তেওঁলোকে কোনো প্ৰমাণ পোৱা নাছিল যে সুশান্তক আত্মহত্যাৰ বাবে প্ৰৰোচিত কৰা হৈছিল। ফলত ৰিয়া চক্ৰৱৰ্তী আৰু তেওঁৰ পৰিয়ালক ক্লিন চিট দিয়া হৈছে।
ইয়াৰ উপৰিও এফ আই আৰ দুখনৰ পৰা ৰিয়া, তেওঁৰ ভাতৃ সৌভিক আৰু পিতৃ-মাতৃৰ নাম বাদ দিবলৈ কোৱা হৈছে। অল ইণ্ডিয়া ইনষ্টিটিউট অৱ মেডিকেল ছায়েন্সৰ ফৰেনছিক টিমেও নিজৰ প্ৰতিবেদনত উল্লেখ কৰিছে যে সুশান্তক হত্যা কৰা হোৱা নাই। তেওঁ আত্মহত্যা কৰিছে, ৩৪ বছৰীয়া অভিনেতাজনৰ মৃত্যু আত্মহত্যা। সুশান্তৰ লেপটপ, হাৰ্ড ডিস্ক, কেমেৰা আৰু দুটা মোবাইলৰ পৰা কোনো গুৰুত্বপূৰ্ণ তথ্য পোৱা নগ’ল।
এই গোচৰৰ পৰৱৰ্তী শুনানি অহা ৮ এপ্ৰিলত বান্দ্ৰা দণ্ডাধীশ আদালতত অনুষ্ঠিত হ’ব। চিবিআইৰ প্ৰতিবেদন মানি ল’লে হত্যাৰ অভিযোগ খাৰিজ কৰা হ’ব।
এই সময়ত সুশান্তৰ প্ৰেমিকা ৰিয়া চক্ৰৱৰ্তীৰ বক্তব্যও চৰ্চালৈ আহিছে। তেওঁৰ অধিবক্তাই কয় যে ৰিয়াই চিবিআইৰ প্ৰতি কৃতজ্ঞতা প্ৰকাশ কৰি কয় যে গোচৰৰ প্ৰতিটো দিশৰ তদন্ত কৰা হৈছে। তেওঁক লৈ যি মিছা অপপ্ৰচাৰ প্ৰচাৰ হৈছিল সেয়া মানসিকভাৱে অতি কঠিন আছিল।
কোনো অভিযোগ নোহোৱাকৈ ২৭ দিন জেলত কটাবলগীয়া হৈছিল ৰিয়াই, আৰু তেওঁক অহৰহ হাৰাশাস্তি কৰা হৈছিল। ৰিয়াই লগতে কয় যে ভৱিষ্যতে কাৰো লগত তেওঁ এনেকুৱা হোৱাটো নিবিচাৰে।
