কেন্দ্ৰীয় মাধ্যমিক শিক্ষা পৰিষদে (চিবিএছই) সোমবাৰে ঘোষণা কৰা দশম শ্ৰেণীৰ পৰীক্ষাৰ ফলাফলত অসমৰ গুৰুকুল গ্ৰামাৰ ছিনিয়ৰ ছেকেণ্ডেৰী স্কুলৰ ছাত্ৰ অৰিন্দম শৰ্মাই দেশৰ ভিতৰত দ্বিতীয় স্থান লাভ কৰি অসমৰ নাম উজ্বলাবলৈ সক্ষম হয়।
মহানগৰীৰ নুনমাটিৰ গোপাল নগৰৰ অমিতাভ শৰ্মা আৰু কৃষ্ণা শৰ্মাৰ পুত্ৰ অৰিন্দমে মুঠ ৪৯৮ নম্বৰ লাভ কৰি দ্বিতীয় স্থান লাভ কৰিবলৈ সক্ষম হয়।
মহানগৰৰ গীতানগৰস্থিত গুৰুকুলৰ ছাত্ৰ অৰিন্দমে গণিত, বিজ্ঞান, সমাজ বিজ্ঞান আৰু কম্পিউটাৰ বিষয়ত ১০০ৰ ভিতৰত ১০০ নম্বৰ লাভ কৰিবলৈ সক্ষম হয়। আনহাতে অসমীয়া আৰু ইংৰাজী বিষয়ত ১০০ৰ ভিতৰত ৯৯ নম্বৰ লাভ কৰে।
উল্লেখযোগ্য যে এইবাৰ চি বি এছ চিৰ পৰীক্ষাত মুঠ ছাত্ৰ-ছাত্ৰীৰ ভিতৰত ১৩ গৰাকীয়ে দেশৰ ভিতৰত শীৰ্ষস্থান লাভ কৰে। একেদৰে ২৫ গৰাকীয়ে দ্বিতীয় স্থান আৰু ৫৮ গৰাকীয়ে তৃতীয় স্থান লাভ কৰে।
আনহাতে অৰিন্দম শৰ্মাৰ সাফ্যলত গুৰুকুল গ্ৰামৰ ছিনিয়ৰ ছেকেণ্ডাৰী স্কুলত উৎসৱমুখৰ পৰিৱেশে বিৰাজ কৰিছে। গুৰুকুলৰ ছাত্ৰ-ছাত্ৰীৰ লগতে শিক্ষকসকলেও অৰিন্দমক শুভেচ্ছা জ্ঞাপন কৰে।
