কেন্দ্ৰীয় চৰকাৰৰ স্বাস্থ্য মন্ত্ৰালয়ৰ নিৰ্দেশ মৰ্মে বৰপেটা জিলাৰ কলগাছিয়া অসামৰিক চিকিৎসালয়ৰ স্বাস্থ্য সেৱা বিভাগৰ কাম-কাজৰ বুজ লোৱাৰ উদ্দেশ্যে সোমবাৰে চিকিৎসালয়খনত উপস্থিত হয় দিল্লীৰ পৰা অহা এটি প্ৰতিনিধি দল।
ডাঃ পবন খান্নাৰ নেতৃত্বত এছ ট্ৰেহান, ডাঃ আশালতা আৰু ডাঃ অৰূপ ডেকাৰে গঠিত চাৰিজনীয়া দলটোৱে জিলাখনত কেন্দ্ৰীয় চৰকাৰে স্বাস্থ্যৰ ক্ষেত্ৰত গ্ৰহন কৰা আঁচনি সমুহৰ সফল প্ৰয়োগ আৰু বিভাগটোৰ সমস্যা সম্পৰ্কত দীৰ্ঘ সময় ধৰি পৰ্যালোচনা কৰে।
দিল্লীৰ পৰা কলগাছিয়াত আহি উপস্থিত হোৱা কমন ৰেভিউ মিশ্যনৰ দলটোৱে সোমবাৰে বৰপেটা জিলাৰ কলগাছিয়া স্বাস্থ্য বিভাগৰ বিষয়াসকলৰ সৈতেও এক আলোচনাচক্ৰত মিলিত হয়৷ আলোচনাৰ সময়ত কেন্দ্ৰীয় চৰকাৰৰ প্ৰতিনিধি দলটোৱে জিলাখনৰ স্বাস্থ্য সেৱা সম্পৰ্কত অধিক পৰ্যালোচনা কৰে।
ইয়াৰ উপৰি প্ৰতিনিধি দলটোৱে দুখীয়া মানুহক উন্নত মানৰ স্বাস্থ্য সেৱা আগবঢ়োৱাৰ ক্ষেত্ৰত অধিক গুৰুত্ব প্ৰদান কৰিবলৈ চিকিৎসালয় কৰ্তৃপক্ষক আহ্বান জনায়৷ এই উদ্দেশ্যে দলটোৱে চিকিৎসালয়, পৰীক্ষাগাৰ পৰীক্ষা কৰাৰ লগতে স্বাস্থ্য সেৱা সম্পৰ্কত চিকিৎসালয়খনে কেনেধৰণে সেৱা আগবঢ়াই সেই সম্পৰ্কে ৰাইজৰ পৰাও মতামত গ্ৰহণ কৰা দেখা যায়।
উল্লেখ্য যে পৰিদৰ্শনৰ অন্তত দলটোৱে স্বাস্থ্য সেৱা বিভাগৰ আসোঁৱাহ সম্পৰ্কে কেন্দ্ৰীয় চৰকাৰৰ ওচৰত প্ৰতিবেদন দাখিল কৰিব৷ দিল্লীৰ পৰা অহা দলটোৱে জিলাখনত ৩ দিন ক্ষেত্ৰ পৰিদৰ্শন কৰাৰ পিছতে বৰপেটা অসামৰিক চিকিৎসালয় কলগাছিয়া স্বাস্থ্য সেৱা বিভাগৰ অৱস্থাৰ বুজ লয়।
