কিছুদিন পূৰ্বে বিহাৰৰ নিৰ্বাচনী সভাত কেন্দ্ৰীয় বিত্ত মন্ত্ৰী নিৰ্মলা সীতাৰমণে কেৱল বিজেপিক ভোট দিয়াসকলেহে বিনামূলীয়াকৈ ক’ৰ’ণা ভেকচিন লাভ কৰিব বুলি কোৱা মন্তব্যই দেশজুৰি তীব্ৰ প্ৰতিক্ৰিয়াৰ সৃষ্টি হৈছিল।
দেশৰ সৰ্বস্তৰত হোৱা প্ৰতিক্ৰিয়াৰ পিছতে এইবাৰ কেন্দ্ৰীয় ৰাজ্যমন্ত্ৰী প্ৰতাপ ছাৰঙ্গিয়ে সমগ্ৰ দেশবাসীয়ে বিনামূল্যে ক’ৰ’ণা ভেকচিন লাভ কৰিব বুলি প্ৰকাশ কৰিছে।
মন্ত্ৰী গৰাকীয়ে দাবী কৰে যে প্ৰধানমন্ত্ৰী নৰেন্দ্ৰ মোদীয়ে দেশৰ প্ৰতিগৰাকী লোককে ক’ৰ’ণা ভেকচিন প্ৰদান কৰিবলৈ বন্দৱস্ত কৰিছে।
মন্ত্ৰী গৰাকীৰ মতে ক’ৰ’ণা ভেকচিন বিনামূল্যে প্ৰদান কৰিবলৈ কেন্দ্রই পাঁচ কোটি টকাৰ অনুমোদন জনাইছে।
৩ নৱেম্বৰত অনুষ্ঠিত হ’বলগীয়া ওড়িশাৰ বালেশ্বৰ বিধান সভা সমষ্টিৰ উপ নিৰ্বাচনৰ এখন নিৰ্বাচনী সভাত ভাষণ দি এইদৰে কয় কেন্দ্ৰীয় মন্ত্ৰী প্ৰতাপ ছাৰঙ্গিয়ে।
“প্ৰধানমন্ত্ৰীয়ে পূৰ্বেই জনাইছে যে আমাৰ দেশৰ ভেকচিনে সাফল্যৰ দিশে আগবাঢ়িছে। তাৰ সুফল সকলোৱে লাভ কৰিব।” মন্ত্ৰী গৰাকীয়ে কয়।
উল্লেখ্য যে ইতমিধ্যে দেশৰ তামিলনাডু, অসম, মধ্যপ্ৰদেশ আৰু পণ্ডুচেৰী চৰকাৰে ৰাজ্যবাসীৰ বাবে ক’ৰ’ণাৰ ভেকচিন বিনামূল্যে যোগান ধৰাৰ কথা ঘোষণা কৰিছে।
এই প্ৰসঙ্গ তুলি মন্ত্ৰী গৰাকীয়ে কয় যে দেশৰ অন্য প্ৰান্তৰ লোকক ক’ৰ’ণা ভেকচিন লাভৰ পৰা বঞ্চিত কৰা নহয়।
উল্লেখ্য যে কিছুদিন পূৰ্বে বিহাৰৰ নিৰ্বাচনী সভাত কেন্দ্ৰীয় বিত্ত মন্ত্ৰী নিৰ্মলা সীতাৰমণে বিজেপিক ভোট দিলে বিনামূলীয়াকৈ ক’ৰ’ণা ভেকচিন লাভ কৰিব বুলি কৰা মন্তব্যৰ পিছতে দিল্লীৰ মুখ্যমন্ত্ৰী অৰবিন্দ কেজৰিৱালে সমগ্ৰ দেশবাসীকে বিনামূল্য ক’ৰ’ণা ভেকচিন দিয়াৰ দাবী উত্থাপন কৰিছে।
