অসমৰ বিভিন্ন স্থানত বিদেশী সন্দেহত ন্যায়াধিকৰণত গোচৰ চলি থকাৰ উপৰি ন্যায়াধিকৰণে বিদেশী বুলি ৰায় দিয়া বহুতকে ডিটেন্যন কেম্পলৈ প্ৰেৰণ কৰা হৈছে। ডিটেনশ্যন কেম্পত বন্দী বহুতেই স্বদেশী হৈও বিদেশী হিচাপে বন্দিত্বৰ জীৱন কটাবলগীয়া হোৱাৰ অভিযোগ উত্থাপিত হৈছে।
ওদালগুৰিৰ নবীন বৰ্মন, বিজনীৰ মধুবালা মণ্ডলৰ পাছত এইবাৰ ডিটেনশ্যন কেম্পত বন্দী হৈ থকা আন এগৰাকী মহিলাৰ নাম পোহৰলৈ আহিছে। বিগত ১৯ মাহ ধৰি চন্দাৰাণী পাল নামৰ মহিলাগৰাকী ডিটেনশ্যন কেম্পত বন্দী হৈ আছে।
দুটাকৈ পুত্ৰ সন্তান আৰু এটি কণমানি কন্যা সন্তানৰ মাতৃ চন্দাৰাণীয়ে বিদেশী গোচৰত ন্যায়াধিকৰণত দোষী সাৱ্যস্ত হৈ বিগত ডেৰ বছৰৰো অধিক কাল ডিটেনশ্যন কেম্পত বন্দী হৈ আছে।
জানিব পৰা মতে, লামডিঙৰ চন্দাৰাণী পালৰ প্ৰায় দহ বছৰ পূৰ্বে হোজাইৰ ডবকা চহৰৰ দুলাল পাল নামৰ ব্যক্তিগৰাকীৰ সৈতে বিবাহপাশত আৱদ্ধ হৈছিল। হঠাতে ডি-ভোটাৰৰ জাননী লাভ কৰে চন্দাৰাণীয়ে। ইয়াৰ পাছতে তেওঁৰ জীৱনলৈ নামি আহে অমানিশা।
যথাসময়ত প্ৰয়োজনীয় নথিপত্ৰ দাখিল কৰিব নোৱাৰাত ন্যায়াধিকৰণে চন্দাৰাণীক বিদেশী বুলি ঘোষণা কৰে আৰু বিগত ১৯ মাহ ধৰি তেওঁ তেজপুৰ ডিটেনশ্যন কেম্পত বন্দী হৈ আছে ৷ চন্দাৰাণীয়ে ডিটেনশ্যন কেম্পলৈ যোৱাৰ সময়ত তেওঁৰ কন্যাৰ বয়স আছিল মাত্ৰ এক বছৰ।
ইপিনে, স্বামীগৃহ আৰু মাতৃগৃহৰ পৰিয়ালে বিদেশী ন্যায়াধিকৰণৰ গোচৰৰ বিৰুদ্ধে প্ৰথমে হোজাই আদালত আৰু তাৰ পিছত গুৱাহাটী উচ্চ ন্যায়ালয়ত আৱেদন কৰি ব্যৰ্থ হোৱাত এতিয়া উচ্চতম ন্যায়ালয়ৰ দ্বাৰস্থ হৈছে।
