পাকিস্তানৰ কৰাচী বিমানবন্দৰত জৰুৰী অৱতৰণ ভাৰতৰ পৰা যোৱা চাৰ্টাৰ জেটৰ
পাকিস্তানৰ কৰাচীস্থিত জিন্না আন্তঃৰাষ্ট্ৰীয় বিমানবন্দৰত জৰুৰী অৱতৰণ কৰে ভাৰতৰ পৰা যোৱা এখন যাত্ৰীবাহী চাৰ্টাৰ জেটে। বাৰগৰাকী যাত্ৰী কঢ়িয়াই নিয়া বিমানখনৰ এই জৰুৰী অৱতৰণৰ কাৰণে জানিব পৰা হোৱা নাই।
বিশেষ বিমানখন হায়দৰাবাদৰ ৰাজীৱ গান্ধী আন্তঃৰাষ্ট্ৰীয় বিমানবন্দৰৰ পৰা উৰা মাৰিছিল আৰু দুপৰীয়া প্ৰায় ১২:১০ বজাত কৰাচী বিমানবন্দৰত অৱতৰণ কৰিছিল।
সংবাদ মাধ্যমত এই খবৰ প্ৰকাশ পোৱাৰ পিছত দেশৰ অসামৰিক বিমান পৰিবহন কৰ্তৃপক্ষ (CAA) ই এই কথা স্বীকাৰ কৰে। অৱশ্যে চাৰ্টাৰ জেটখন ভাৰতৰ নহয় বুলি অসামৰিক বিমান পৰিবহন কৰ্তৃপক্ষই উল্লেখ কৰিছে।
অসামৰিক বিমান পৰিবহন কৰ্তৃপক্ষৰ বিবৃতি মতে বিদেশী চাৰ্টাৰ জেটখন ভাৰতৰ পৰা উৰা মাৰিছিল। তাৰ বাহিৰে জেটখনৰ ভাৰতৰ সৈতে আন কোনো সম্পৰ্ক নাছিল।
বিশেষ বিমানখন কৰাচীত উপস্থিত হোৱাৰ অলপ পিছতে উৰা মাৰিছিল। অৱশ্যে জেটখন কিয় কৰাচী আন্তঃৰাষ্ট্ৰীয় বিমানবন্দৰত উপস্থিত হৈছিল সেয়া স্পষ্ট নহয়।
উল্লেখ্য যে যোৱা মাহতো যান্ত্ৰিক অসুবিধাৰ বাবে কৰাচীত দুখন ভাৰতীয় জেট অৱতৰণ কৰিছিল।
স্পাইচজেটৰ দিল্লীৰ পৰা ডুবাই অভিমুখী এখন বিমানে ৫ জুলাইত বিজুতিৰ বাবে যাত্ৰপথ সলনি কৰি কৰাচী বিমানবন্দৰত জৰুৰী অৱতৰণ কৰিছিল।
সেইদৰে ১৭ জুলাইত ছাৰজাহৰ পৰা হায়দৰাবাদলৈ অহা ইণ্ডিগ’ৰ এখন বিমানৰ ইঞ্জিনত ঘটা বিজুতিৰ বাবে কৰাৰ পিছত সাৱধানতামূলক ব্যৱস্থা হিচাপে তাৎক্ষণিকভাৱে কৰাচীত অৱতৰণ কৰা হৈছিল।