ছত্তীশগড়ৰ ৰাজ্যপাল ৰমেন ডেকাই এটা ভাল খবৰ সদৰী কৰিছে। ৰাজ্যখনৰ পণ্ডিত ৰবিশংকৰ শুক্লা বিশ্ববিদ্যালয়ত শ্ৰীমন্ত শংকৰদেৱৰ নামত এখন আসন প্ৰতিষ্ঠা কৰা হ’ব। ইয়াৰ বাবে বাজেটত ২ কোটি টকা ধাৰ্যও কৰা হৈছে।
আনহাতে, ছত্তীশগড়ৰ সৈতে অসমৰ সাংস্কৃতিক বিনিময়ৰ সন্দৰ্ভতো ৰাজ্যপাল ডেকাই পদক্ষেপ গ্ৰহণ কৰিছে।
ছত্তীশগড়ৰ ৰাজ্যপাল হিচাপে দায়িত্ব লোৱাৰ পাছতেই ৰমেন ডেকাই অসমৰ সৈতে ৰাজ্যখনৰ মধুৰ সম্পৰ্ক গঢ়ি তোলাৰ প্ৰয়াস চলাব বুলি সদৰী কৰিছিল।
ৰাজ্যপাল ৰমেন ডেকাই সোমবাৰে গুৱাহাটীত এক সংবাদ মেল সম্বোধন কৰি এই ভাল খবৰটো সদৰী কৰে। মহানগৰীৰ ছাত্ৰীবাৰীৰ নিজৰ বাসভৱনত সংবাদ মেল সম্বোধন কৰি ডেকাই কয় যে, ছত্তীশগড়ৰ পণ্ডিত ৰবিশংকৰ শুক্লা বিশ্ববিদ্যালয়ত শ্ৰীমন্ত শংকৰদেৱৰ নামত এখন আসন সংৰক্ষণ হ’ব। তাৰ বাবে ৰাজ্যখনৰ বাজেটত ২ কোটি টকা ধাৰ্য কৰা হৈছে। ছত্তীশগড়ৰ ৰাজ্যভাষাতে শিক্ষাৰ্থীয়ে মহাপুৰুষ জনাৰ সৃষ্টিৰাজিৰ সন্দৰ্ভত গৱেষণা কৰিব পাৰিব।
তেওঁ উল্লেখ কৰে যে ৫০ বছৰ পূৰ্বে মহেন্দ্ৰ মোহন চৌধুৰী পাঞ্জাৱৰ ৰাজ্যপাল হৈ থাকোতেই পাঞ্জাৱৰ বিশ্ববিদ্যালয়ত শ্ৰীমন্ত শংকৰদেৱৰ নামত এখন আসন প্ৰতিষ্ঠা কৰিছিল। তাৰ ঠিক ৫০ বছৰ পাছত এতিয়া ছত্তীশগড়ৰ বিশ্ববিদ্যালয়তো শ্ৰীমন্ত শংকৰদেৱৰ নামত আসন প্ৰতিষ্ঠা হৈছে। নতুন শিক্ষাবৰ্ষ আৰম্ভ কৰাৰ সময়তে বিশ্ববিদ্যালয়খনত এই নতুন আসনখন প্ৰতিষ্ঠা কৰা হ’ব।
সংবাদ মেলত তেওঁ সদৰী কৰে যে এনে পদক্ষেপ গ্ৰহণৰ জৰিয়তে তেওঁ নিজকে এগৰাকী অসমীয়া হিচাপে গৌৰৱবোধ কৰিছে। তেওঁ লগতে জানিবলৈ দিয়ে যে দুয়োখন ৰাজ্যৰ মাজত সাংস্কৃতিক বিনিময়ৰ লক্ষ্যৰে গুৱাহাটী উজান বজাৰৰ মহিলা ভাওনা দলক ছত্তীশগড়ত ভাওনা প্ৰদৰ্শন কৰিবলৈ নিয়া হ’ব।
ইপিনে, ৰাজ্যপাল ডেকাই অসম আৰু ছত্তীশগড়ৰ মাজৰ সম্পৰ্ক সুদৃঢ় কৰিবলৈ অসমত এটা ছত্তীশগড় ভৱন নিৰ্মাণৰো প্ৰস্তাৱ দিছে।
