আজি ঘোষিত উপ নিৰ্বাচনৰ ফলাফলত আটাইকেইটা সমষ্টিতে বিজয় সাব্যস্ত কৰাৰ পিছত হেঙেৰাবাৰীৰ বাজপেয়ী ভৱনত সংবাদ মেল সম্বোধন কৰে মুখ্যমন্ত্ৰী হিমন্ত বিশ্ব শৰ্মাই।
সংবাদ মেলত মুখ্যমন্ত্ৰী শৰ্মাই বিজেপিক বিপুল জনাদেশ দিয়া ৰাইজক কৃতজ্ঞতা জনাই কয়, “৫ সমষ্টিৰ ৰাইজলৈ মূৰ দোৱাই সেৱা জনাইছো। ৰাইজৰ আশীৰ্বাদ শিৰত তুলি লৈছো। নিৰ্বাচনৰ পূৰ্বে দিয়া প্ৰতিটো প্ৰতিশ্ৰুতি দৃঢ়ভাৱে ৰূপায়ণ কৰা হ’ব।”
মিজোৰাম, নাগালেণ্ড, মেঘালয় আৰু অসমত NEDA ৰ নিৰঙ্কুশ বিজয়ে পুনৰ এবাৰ বিজেপিৰ প্ৰতি থকা ব্যাপক সমৰ্থন আকৌ এবাৰ দোহাৰিলে বুলি মন্তব্য কৰে NEDAৰ আহ্বায়কজনে।
তেওঁ কয়, “গত নিৰ্বাচনত সুশান্ত বৰগোহাঁই আৰু ফণীধৰ তালুকদাৰ তিনিহাজাৰ ভোটত জিকিছিল। কিন্তু এইবাৰ বৃহৎ ভোটৰ ব্যৱধানত জয়ী হৈছে। বহুদিন থাওৰাৰ ৰাজনৈতিক ইতিহাসত এনে বিজয় দেখা নাছিল।মৰিয়নিতো অভিলেখ সংখ্যক ভোটত জয়ী হৈছে বিজেপি।”
অনাগত চাৰে চাৰি বছৰত সকলো ৰাইজক বিশ্বাসত লৈ সভ্যতা আৰু বিকাশ আগত ৰাখি অসমখনক ভাৰতৰ পাঁচখন শ্ৰেষ্ঠ ৰাজ্য হিচাপে প্ৰতিষ্ঠা কৰিম বুলি প্ৰতিশ্ৰুতি দিয়ে মুখ্যমন্ত্ৰী হিমন্ত বিশ্ব শৰ্মাই।
আনহাতে ভৱানীপুৰ সমষ্টিৰ বিজয় সন্দৰ্ভত হিমন্ত বিশ্ব শৰ্মাই কয়, “অসম আন্দোলনৰ শ্বহীদৰ ভূমি AIUDF ৰ হাতত থকাটো জাতিটোৰ বাবে অতিকৈ লজ্জাজনক আছিল। ২০০৬ চনৰ পাছত সেই বেদনা ধুবলৈ পাই গৌৰৱ অনুভৱ কৰিছো।”
উপ নিৰ্বাচন সঘনাই হোৱাটোও ভাল নহয়, কিন্তু অসমৰ দুই তিনিটা সমষ্টিত ৰাইজে উপ নিৰ্বাচন বিচাৰে বুলি গুৰুত্বপূৰ্ণ মন্তব্য কৰে মুখ্যমন্ত্ৰীজনে।
বিশেষকৈ কংগ্ৰেছ সন্দৰ্ভত মুখ্যমন্ত্ৰী শৰ্মাৰ মন্তব্যই অসমৰ অনাগত সময়ৰ ৰাজনীতিৰো পূৰ্বাভাস দাঙি ধৰিছে। তেওঁ কয়, “কংগ্ৰেছৰ দুই এজন বিধায়কে কৈছে যে কংগ্ৰেছ হাৰিবই। কংগ্ৰেছৰ সভাপতি জন বিধায়ক নহয়, তেওঁৰ লগত বহি থকা লোকে ফোন কৰি মোক কৈছে হাৰিম বুলি।”
গোসাইগাঁও সমষ্টিত টেক্টৰৰ নামত ৰুলাৰত ভোট দিছে বুলি মন্তব্য কৰে হিমন্ত বিশ্ব শৰ্মাই।
তদুপৰি তেওঁ কয়, “আমি উন্নয়ন সকলোৰে বাবে কৰিম কিন্তু যি আমাক ভোট নিদিয়ে বা সম্ভাৱনা নাই তাক ভোট নোখোজোঁ। এইবাৰ বৃহৎ সংখ্যক সংখ্যালঘু লোকে ভোট দিছে বিজেপিক।”
উচ্ছেদ সন্দৰ্ভত মুখ্যমন্ত্ৰী শৰ্মাই কয়, “চৰৰ মাটি ছাৰ্ভে হোৱাৰ প্ৰয়োজন আছে। বহু মাটি অবৈধভাৱে দখল কৰি আছে। লামডিং বনাঞ্চলত মহাজনী ব্যৱস্থা চলি আছে। উচ্ছেদ আৰু ছাৰ্ভে কৰিলে বহু দুখীয়া সংখ্যালঘু লোকে ভূমি লাভ কৰিব।”
