মৰিগাঁৱত অনুষ্ঠিত হ’ব লগীয়া শ্ৰীমন্ত শংকৰদেৱ সংঘৰ ৮৮ সংখ্যক কেন্দ্ৰীয় অধিৱেশন সূচাৰুৰূপে অনুষ্ঠিত কৰাৰ বাবে শনিবাৰে মুখ্য মন্ত্ৰী সৰ্বানন্দ সোণোৱালৰ পৌৰোহিত্যত মুখ্য মন্ত্ৰীৰ সভা কক্ষত এক বৈঠক অনুষ্ঠিত হয়।
বৈঠকত শ্ৰীমন্ত শংকৰদেৱ সংঘৰ বিষয়ববীয়া সকলে আগন্তুক অধিৱেশনৰ প্ৰস্তুতিৰ বিভিন্ন দিশ সম্পৰ্কে মুখ্য মন্ত্ৰীক অৱগত কৰোৱা হয়।
তাৰোপৰি অধিৱেশন উপলক্ষে মৰিগাঁও জিলাৰ বাট-পথৰ উন্নয়ন সাধন, অধিৱেশন স্থলীত পানী আৰু বিদ্যুৎ যোগানকে ধৰি আদি দিশতো আলোচনা কৰা হয়।
ফলত মুখ্য মন্ত্ৰী গৰাকীয়ে অঞ্চলটোৰ বাট-পথ উন্নয়ন সাধন, অধিৱেশনস্থলীত শৌচাগাৰ, বিশুদ্ধ খোৱাপানী যোগান, বিদ্যুৎ সংযোগকে ধৰি অধিৱেশনৰ বাবে প্ৰয়োজনীয় সকলো ব্যৱস্থা গ্ৰহণৰ বাবে উচ্চ পদস্থ বিষয়া সকলক নিৰ্দেশ দিয়ে।
লগতে মুখ্য মন্ত্ৰী গৰাকীয়ে স্থানীয় বিধায়ক ৰমাকান্ত দেউৰীক ৰাজ্য চৰকাৰৰ সকলোবোৰ দিশ চোৱা-চিতা কৰিবলৈও নিৰ্দেশ দিয়ে।
শনিবাৰৰ বৈঠকখনত সাংস্কৃতিক বিভাগৰ মন্ত্ৰী নৱ কুমাৰ দলে, বিদ্যুৎ বিভাগৰ স্বতন্ত্ৰ ৰাজ্যিক মন্ত্ৰী তপন কুমাৰ গগৈ, বিধায়ক ৰমাকান্ত দেউৰী, মুখ্য সচিব আলোক কুমাৰ, ব্ৰহ্মপুত্ৰ ব’ৰ্ডৰ চেয়াৰমেন ৰাজীৱ যাদৱ, মৰিগাঁও জিলাৰ উপায়ুক্ত, আৰক্ষী অধীক্ষক, ৰাজ্য চৰকাৰৰ উচ্চপদস্থ বিষয়া আৰু শংকৰদেৱ সংঘৰ বিষয়ববীয়া সকল উপস্থিত আছিল।
