কিছুদিন পূৰ্বে কাজিৰঙা ৰাষ্ট্ৰীয় উদ্যানত এটা গঁড় নিধনত জড়িত থকা চোৰাং চিকাৰীক কৰায়ত্ত্ব কৰাৰ নিৰ্দেশ মুখ্য মন্ত্ৰী সোণোৱালৰ
আগন্তুক বাৰিষাৰ সময়ছোৱাত কাজিৰঙা ৰাষ্ট্ৰীয় উদ্যানৰ বন্যপ্ৰাণী সুৰক্ষা নিশ্চিত কৰা আৰু চোৰাং চিকাৰ ৰোধ কৰাৰ বাবে ৰাষ্ট্ৰীয় উদ্যানখনৰ বন্যপ্ৰাণীৰ সুৰক্ষা নিশ্চিত কৰা আৰু চোৰাং চিকাৰ ৰোধ কৰাৰ বাবে ৰাষ্ট্ৰীয় উদ্যানখনৰ সীমান্তৱৰ্তী গোলাঘাট, নগাঁও, শোণিতপুৰ, বিশ্বনাথ আৰু কাৰ্বি আংলং জিলা প্ৰশাসন আৰু বন বিভাগৰ প্ৰস্তুতি সম্পৰ্কে বুজ লোৱাৰ বাবে আজি কাজিৰঙাস্থিত আয়োৰা ৰিজৰ্টৰ সভাগৃহত অনুষ্ঠিত এখন বৈঠকত মুখ্য মন্ত্ৰী সোণোৱালে অংশগ্ৰহণ কৰে।
মুখ্য মন্ত্ৰী সোণোৱালে বৈঠকত কয় যে, বিগত সময়ছোৱাত ৰাজ্য চৰকাৰে গ্ৰহণ কৰা কঠোৰ পদক্ষেপৰ বাবে ৰাজ্যত গঁড় হত্যা উল্লেখনীয়ভাৱে হ্ৰাস পাইছে। অসম চৰকাৰৰ অনুৰোধ মৰ্মে গুৱাহাটী উচ্চ ন্যায়ালয়ে গঠন কৰা ফাষ্ট ট্ৰেক কোৰ্টে ইতিমধ্যে কেইবাগৰাকীও চোৰাং চিকাৰীক দোষী সাব্যস্ত কৰি কঠোৰ শাস্তি প্ৰদান কৰিছে।
বৈঠকত সোণোৱালে বন্যপ্ৰাণী সমূহৰ স্বাস্থ্যৰ যতনৰ প্ৰতি লক্ষ্য ৰাখি আৰু এই দিশত অধিক সুবিধা হোৱাকৈ পশু পালন বিভাগৰ চিকিৎসক আৰু কৰ্মচাৰীৰ লগতে বন বিভাগৰ কৰ্মচাৰীক উপযুক্ত প্ৰশিক্ষণেৰে কৌশলী কৰি তুলিবলৈও মুখ্য মন্ত্ৰীয়ে নিৰ্দেশ দিয়ে।
বন বিভাগৰ অন্তৰ্গত খালী হৈ থকা সকলোবোৰ পদ শীঘ্ৰে পূৰণৰ বাবে যাৱতীয় পদক্ষেপ গ্ৰহণ কৰিবলৈ নিৰ্দেশ দি মুখ্য মন্ত্ৰীয়ে সোণোৱালে কয় যে বন বিভাগে বন্যপ্ৰাণী সুৰক্ষাৰ বাবে গ্ৰহণ কৰা পদক্ষেপ সমূহৰ সম্পৰ্কে জনসাধাৰণ যাতে অৱগত হয় তাৰ বাবে বিভাগটোৱে কাৰ্য্যব্যৱস্থা হাতত ল’ব লাগিব।
এই বৈঠকত কাজিৰঙা ৰাষ্ট্ৰীয় উদ্যানৰ সঞ্চালক পি শিৱ কুমাৰে মুখ্য মন্ত্ৰী সোণোৱালক অৱগত কৰে যে বিগত বৰ্ষত ৰাষ্ট্ৰীয় উদ্যানখনত তিনিটা গঁড় নিধন হোৱাৰ বিপৰীতে চলিত বৰ্ষত এটা গঁড় চোৰাং চিকাৰীৰ হাতত নিধন হৈছে।
আগন্তুক বানপানীৰ সময়ছোৱাত বন্যপ্ৰাণীৰ সুৰক্ষা নিশ্চিত কৰাৰ বাবে ৩০০ খন নাও, ১৮ খন স্পীড বোট আৰু ভাসমান কেম্প সাজু কৰি তোলা হৈছে বুলিও তেওঁ মুখ্য মন্ত্ৰীক কয়।
আনহাতে, কিছুদিন পূৰ্বে ৰাষ্ট্ৰীয় উদ্যানখনত এটা গঁড় চোৰাং চিকাৰীৰ হাতত নিহত হোৱা বিষয়টো উত্থাপন কৰি শীঘ্ৰে চোৰাং চিকাৰীক কৰায়ত্ত্ব কৰাৰ বাবে প্ৰয়োজনীয় পদক্ষেপ ল’বলৈও মুখ্য মন্ত্ৰীয়ে আৰক্ষী আৰু বন বিভাগক নিৰ্দেশ দিয়ে।