তিনিচুকীয়া জিলাৰ লেখাপানীত আজি এগৰাকী লোকৰ বাৰীৰ চৌদিশে দিয়া বিদ্যুৎ পৰিবাহী তাঁৰত লাগি এটি ৭ বছৰীয়া শিশু মৃত্যুমুখত পৰাৰ লগতে আন এটি দহ বছৰীয়া শিশু গুৰুতৰভাৱে আহত হোৱা ঘটনাক কেন্দ্ৰ কৰি অঞ্চলটোত চেপা উত্তেজনাই বিৰাজ কৰি আছে।
ঘটনাৰ বিৱৰণি অনুসৰি আজি পুৱা প্ৰায় ৭ বজাত লেখাপানী থানাৰ অন্তৰ্গত ফানেঙৰ ৰঞ্জিত পজিয়াল নামৰ এজন লোকৰ বাৰীত একেখন গাঁৱৰে ফানেং প্ৰাথমিক বিদ্যালয়ৰ তৃতীয় শ্ৰেণীৰ ছাত্ৰ আই নয় মানহাই(৭), বাব্লু ভূমিজ(১০) আৰু এটি শিশু কাঠ-ফুলা বিচাৰি প্ৰৱেশ কৰিব লওঁতেই এই কৰুণ দুৰ্ঘটনাটো সংঘটিত হয়।
শাক পাচলিৰ বাৰীখনত জীৱ-জন্তু প্ৰৱেশৰ পৰা বাধা দিবলৈ সংযোগ কৰি ৰখা বিদুৎ প্ৰবাহিত তাঁৰত লাগি আই নয় মানহাইৰ থিতাতে মৃত্যু হোৱাৰ লগতে বাব্লু ভূমিজ আহত হয়।
দুৰ্ঘটনাটোৰ পৰা কথমপি ৰক্ষা পৰা আনটি শিশুৱে গাঁৱৰ ৰাইজক খবৰ দিয়াত স্থানীয় ৰাইজ ঘটনাস্থলীত উপস্থিত হৈ আহত শিশুটিক চিকিৎসালয়লৈ প্ৰেৰণ কৰাৰ লগতে ক্ষুব্ধ ৰাইজে বিদ্যুৎ চুৰি কৰি বাৰীত সংযোগ কৰা ৰঞ্জিত পাজিয়ালৰ ঘৰ, শাক-পাচলিৰ বাৰী লণ্ড-ভণ্ড কৰাৰ লগতে প্ৰশাসনৰ ওচৰত বিহিত ব্যৱস্থা গ্ৰহণৰ দাবী জনায়।
আনহাতে বিদ্যুৎ বিভাগৰ তৰফৰ পৰাও লেখাপানী আৰক্ষী থানাত ৰঞ্জিতৰ বিৰুদ্ধে এজাহাৰ দাখিল কৰা হৈছে, অৱশ্যে অভিযুক্ত ৰঞ্জিত পজিয়াল সম্প্ৰতি পলাতক অৱস্থাত আছে বুলি জানিব পৰা গৈছে।
জাগুন আৰক্ষীয়ে পিছত নিহত শিশুটিৰ মৃতদেহ মৰণোত্তৰ পৰীক্ষাৰ প্ৰেৰণ কৰে।
স্থানীয় ৰাইজে নিহত আই নয় মানহাইৰ পৰিয়ালক উপযুক্ত ক্ষতিপূৰণ আৰু আহত বাব্লু ভূমিজৰ চিকিৎসাৰ ব্যৱস্থাৰ দাবী জনাই লেখাপানী আৰক্ষী থানাত এক উত্তাল পৰিস্থিতিৰ সৃষ্টি কৰিছিল। প্ৰশাসনৰ লোকে বিহিত ব্যৱস্থা গ্ৰহণ কৰাৰ আশ্বাস দিয়াত পৰিস্থিতি শাম কাটে যদিও এতিয়াও অঞ্চলটোত চেপা উত্তেজনাই বিৰাজ কৰি আছে।
