লকডাউনৰ বিৰুদ্ধে চীনত আজিও অব্যাহত আছে প্ৰতিবাদ। প্ৰতিবাদ নিৰ্মূল কৰিবলৈ চীনৰ চৰকাৰে বিশ্ববিদ্যালয়ৰ শিক্ষাৰ্থীসকলক ঘৰলৈ যাবলৈ নিৰ্দেশ দিছে। ইপিনে চীনৰ এনে পৰিস্থিতিৰ বাতৰি সংগ্ৰহ কৰিবলৈ যোৱা বিবিচিৰ এজন সাংবাদিকক আজি চীনা সেনাই অকথ্য নিৰ্যাতন চলাই গ্ৰেপ্তাৰ কৰাৰ ঘটনাই সমগ্ৰ বিশ্বতে প্ৰতিক্ৰিয়াৰ সৃষ্টি কৰিছে।
উল্লেখ্য কোভিড সংক্ৰমণৰ বাবেই চীনৰ বিভিন্ন প্ৰান্তত কঠোৰ লকডাউন ঘোষণা কৰা হৈছে। মানুহ গৃহবন্দী হৈ থাকিবলগীয়া হোৱাত অতিষ্ঠ হৈ পৰিছে। এনে পৰিস্থিতিত মানুহ উত্তেজিত হৈ পৰিছে আৰু চৰকাৰৰ বিৰুদ্ধে প্ৰতিবাদ কৰিবলৈ ৰাজপথলৈ ওলাই আহিছে।
চৰকাৰৰ কোভিড নীতিৰ বিৰুদ্ধে প্ৰতিবাদ কৰিবলৈ বেইজিং আৰু ছাংহাইত হাজাৰ হাজাৰ মাউহে ৰাজপথলৈ ওলাই আহিছে। আজিও আন্দোলন চলিয়েই আছে। আৰক্ষী-প্ৰশাসনে প্ৰতিবাদকাৰীৰ বিৰুদ্ধে কঠোৰ ব্যৱস্থা গ্ৰহণ কৰিছে।
ঝি জিনপিং চৰকাৰে কৰোনা ভাইৰাছৰ বিৰুদ্ধে দি থকা যুঁজত ‘কোভিড-মুক্ত নীতি’ গ্ৰহণ কৰিছে। সেয়ে গ্ৰহণ কৰা হৈছে অধিক কঠোৰ পদক্ষেপ। চৰকাৰৰ কঠোৰ কোভিড নিয়মৰ বিৰুদ্ধে জনতাৰ প্ৰতিবাদ সমগ্ৰ দেশতে বিয়পি পৰিছে। চৰকাৰৰ বিৰুদ্ধে এনে স্বতঃস্ফূৰ্ত গণ আন্দোলন চীনত বিৰল বুলি ক’ব পাৰি। আনকি কোভিডৰ প্ৰথম সংক্ৰমণৰ সময়তো তেনে হোৱা নাছিল।
