পূব লাডাখৰ গালোৱান ভেলীত চীনৰ সেনাই আক্ৰমণ চলাই ২০ জনকৈ ভাৰতীয় সেনাক হত্যা কৰাৰ প্ৰসংগত প্ৰায় দুমাহৰ অন্তত প্ৰতিক্ৰিয়া ব্যক্ত কৰিছে চীনে।
ভাৰতত থকা চীনৰ ৰাষ্ট্ৰদূত ছান ৱেংদ’ই ভাৰতীয় সেনাক চীনৰ সেনাই হত্যা কৰাৰ ঘটনাটোক দুৰ্ভাগ্যজনক আখ্যা দিছে।
১৮ আগষ্টতে অনুষ্ঠিত ‘ইণ্ডিয়া চাইনা য়ুথ ফ’ৰাম’ৰ ভাৰ্চুৱেল বৈঠকত অংশগ্ৰহণ কৰি চীনৰ ৰাষ্ট্ৰদূত গৰাকীয়ে এনেদৰে কয়।
উক্ত দিনা চীনৰ ৰাষ্ট্ৰদূত গৰাকীয়ে দিয়া ভাষণৰ অনুবাদ যোৱা নিশাহে চীনে প্ৰকাশ কৰিছে।
চীনৰ ৰাষ্ট্ৰদূত গৰাকীয়ে কৈছে যে ভাৰতৰ সৈতে চীনৰ সম্পৰ্ক অতি প্ৰাচীন।
বিগত ৭০ বছৰ ধৰি এই সম্পৰ্ক অধিক মজবুত হৈ পৰিছে। এনে সময়তে গালোৱান ভেলীত সংঘটিত ঘটনা অপ্ৰত্যাশিত আৰু দুৰ্ভাগ্যজনক বুলি তেওঁ উল্লেখ কৰে।
দক্ষিণ-পূব এছিয়াৰ দুখন শক্তিশালী দেশ হিচাবে ভাৰত আৰু চীনে অৰ্থনৈতিক ক্ষেত্ৰত চুম্বকৰ দৰে ইখনে সিখন দেশক আকৰ্ষণ কৰা উচিৎ বুলি তেওঁ কয়।
ভাৰতৰ সৈতে চীনে সদায় সৌহাৰ্দ্যপূৰ্ণ সম্পৰ্ক বজাই ৰাখিব বিচাৰে বুলিও তেওঁ মন্তব্য কৰে।
উল্লেখ্য চীনৰ সেনাই লাডাখত প্ৰৱেশ কৰি ২০ জনকৈ ভাৰতীয় সেনাক হত্যা কৰাৰ ঘটনাকলৈ দুয়োখন দেশৰ মাজত এতিয়াও চৰম উত্তেজনাৰ সৃষ্টি হৈ আহিছে।
