ভাৰতৰ ভূখণ্ডত ৪০০ মিটাৰ দৈৰ্ঘ্যৰ এখন দলং নিৰ্মাণ কৰিছে চীনে। কেৱল সেয়াই নহয় ইয়াৰ ওপৰেৰে যান-বাহনো চলাইছে ।
শেহতীয়াকৈ উপগ্ৰহৰ ছবিত ধৰা পৰিছে এই তথ্য। এই পকী দলংখন লাডাখৰ পেংগং হ্ৰদৰ উত্তৰ আৰু দক্ষিণ পাৰক সংযোগ কৰিবলৈ নিৰ্মাণ কৰা হৈছে। এতিয়া স্বাভাৱিকতে দেশৰ নিৰাপত্তাৰ বিষয়টো আকৌ আহি পৰিছে।
২০২০ চনৰ জুন মাহত পেংগং হ্ৰদৰ সমীপৰ গালৱান উপত্যকাত ভাৰত আৰু চীনৰ সৈন্যৰ মাজত সংঘৰ্ষ হৈছিল। তাৰ পিছৰে পৰা দুয়োখন দেশৰ সম্পৰ্ক বেয়াৰ ফাললৈ ঢাল খাইছে।
সূত্ৰ অনুসৰি, উক্ত ঘটনাৰ পিছতে চীনে এই দলংখন নিৰ্মাণৰ কাম আৰম্ভ কৰিছিল। বৰ্তমান এই দলংখন সম্পূৰ্ণ হৈছে।
অৱশ্যে এই দলং নিৰ্মাণৰ কামৰ বিষয়ে চীনে কেতিয়াও কোনো ঘোষণা কৰা নাই। উপগ্ৰহৰ ছবিৰ পৰাহে এই তথ্য পোহৰলৈ আহিছে। উপগ্ৰহৰ ছবিত এই দলঙত চীন যান-বাহনৰ চলাচলো পোহৰলৈ আহিছে।
খবৰ অনুসৰি এই দলংখনে লাডাখ আৰু চীনৰ মাজৰ দূৰত্ব ৫০ৰ পৰা ১০০ কিলোমিটাৰ পৰ্যন্ত হ্ৰাস কৰিছে। ফলত ভৱিষ্যতে যদি পুনৰ ৰঙা চীন আৰু ভাৰতীয় সেনাৰ মাজত সংঘাতৰ সৃষ্টি হয়, তেন্তে চীনে ডাঙৰ সুবিধা লাভ কৰিব।
বিশেষজ্ঞসকলৰ মতে এই দলং নিৰ্মাণ কৰি চীনে প্ৰকৃততে লাডাখৰ ওপৰত অধিক নিয়ন্ত্ৰণ লাভ কৰিব বিচাৰিছে। নতুন দলংখনৰ জৰিয়তে অতি শীঘ্ৰে যুদ্ধৰ সা-সঁজুলি অনা সম্ভৱ হৈছে। ভাৰতৰ লগত কোনো যুদ্ধ বা বিবাদ হ’লে তাৎক্ষণিকভাবে সেনা মোতায়েন কৰিবলৈ সুবিধা হৈছে।
সম্প্ৰতি জম্মু-কাশ্মীৰত বৃদ্ধি পাইছে সন্ত্ৰাসবাদী কাৰ্যকলাপ। বিগত কেইমাহমানৰ ভিতৰত উপত্যকাটোত কেইবাজনো জোৱান শ্বহীদ হৈছে। তাত প্ৰতিদিনে দেশৰ সেনাই কিবা নহয় কিবা আক্ৰমণৰ সন্মুখীন হৈছে। ইফালে লাডাখৰ এই দলংখনৰ খবৰে পুনৰ ভাৰতীয় সেনাক চিন্তিত কৰি তুলিছে।
