ক’ভিদ প্ৰতিৰোধৰ লক্ষ্য: বিশ্বৰ সৰ্ববৃহৎ আইফোন নিৰ্মিত ফেক্টৰী থকা এলেকাত লক ডাউন ঘোষণা চীনৰ
ক’ভিদৰ প্ৰাদুৰ্ভাৱে পুনৰ গুৰুতৰ ৰূপ লোৱাৰ পিছত ক’ভিদ নিয়ন্ত্ৰণৰ লক্ষ্যৰে সৰ্ববৃহৎ আইফোন কাৰখানাৰ কাষৰীয়া এলেকাত লক ডাউন ঘোষণা কৰিছে চীন প্ৰশাসনে।
মধ্য চীনৰ ঝেংঝৌ বিমানবন্দৰ অৰ্থনীতি ক্ষেত্ৰৰ বিষয়াসকলে আজি এক বিবৃতিত জানিবলৈ দিয়া মতে স্বাস্থ্যকৰ্মী আৰু অত্যাৱশ্যকীয় বিভাগীয় কৰ্মীৰ বাহিৰে সকলো লোকে ক’ভিদ পৰীক্ষা আৰু জৰুৰীকালীন চিকিৎসা লাভৰ বাহিৰে কোনো কাৰণতে নিজৰ বাসগৃহ এৰিব নোৱাৰিব।
উল্লেখ্য যে যোৱা সপ্তাহত চীনা ছ’চিয়েল মিডিয়াত টাইৱানী প্ৰযুক্তি বিদ্যাৰ প্ৰতিষ্ঠান ফক্সকনৰ দ্বাৰা পৰিচালিত আৰু কেইবা হাজাৰ শ্ৰমিক নিয়োজিত প্ৰতিষ্ঠানৰ পৰা বহু লোক বাহিৰলৈ ওলাই অহাৰ ছবি প্ৰকাশ পাইছিল।
এই ছবিসমূহে তীব্ৰ চাঞ্চল্যৰ সৃষ্টি কৰিছিল প্ৰদেশখনত। ইয়াৰ পাছতে আজি চীনা প্ৰশাসনে এই লক ডাউনৰ সিদ্ধান্ত গ্ৰহণ কৰিছে।
উল্লেখ্য যে ফক্সকন পৰিচালিত প্ৰতিষ্ঠানটোৰ কৰ্মচাৰীসকলে উদ্বেগজনক পৰিস্থিতিৰ বিষয়ে সামাজিক মাধ্যমত অভিযোগ কৰি আহিছিল আৰু খোজকাঢ়িয়েই কাৰখানাৰ পৰা পলায়ন কৰিছিল।
শূণ্য-ক’ভিদ নীতিৰ বাবে প্ৰতিশ্ৰুতিবদ্ধ চীনে ক্ৰমবৰ্ধমান ক’ভিদ প্ৰাদুৰ্ভাৱ নিয়ন্ত্ৰণৰ বাবে লকডাউনৰ লগতে ক’ভিদ পৰীক্ষণৰ ব্যৱস্থা অব্যাহত ৰাখিছে।
দেশখনত আজি একেৰাহে তৃতীয় দিনৰ বাবে ২,০০০ তকৈও অধিক নতুন সংক্ৰমণৰ প্ৰতিবেদন প্ৰকাশ পাইছে।