বৰ্তমান লাডাখৰ বাস্তৱ পৰিস্থিতি কি? এই সম্পৰ্কে বিভিন্ন প্ৰশ্নৰ উত্থাপন হৈ থকাৰ সময়তে কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে আজি মুখ খুলিছে।
কেন্দ্ৰীয় প্ৰতিৰক্ষা মন্ত্ৰী গৰাকীয়ে কয়ল যে লাডাখৰ বিষয়ে যি ক’ব লগা আছে, সেয়া সংসদতহে ক’ব।
‘মই এই বিষয়ে মানুহক বিভ্ৰান্ত কৰিব নিবিচাৰো।’ প্ৰতিৰক্ষা মন্ত্ৰী ৰাজনাথ সিঙৰ মন্তব্য।
নৰেন্দ্ৰ মোদীৰ প্ৰথমটো কাৰ্যকালত পাকিস্তানৰ উৰি আক্ৰমণৰ বিৰুদ্ধে ভাৰতে চলোৱা চাৰ্জিকেল ষ্ট্ৰাইকক অন্যতম সাফল্য হিচাপে দাঙি ধৰা হয়।
কিন্তু মোদীৰ চৰকাৰ দ্বিতীয়টো কাৰ্যকালৰ দ্বিতীয়টো বৰ্ষপুতিৰ সময়ত লাডাখৰ চীন সীমান্তৰ নিয়্ন্ত্ৰণ ৰেখাত চীন আৰু ভাৰতীয় সেনাৰ দ্বন্দ্বই মোদী চৰকাৰক যথেষ্ট অস্বস্তিত পেলোৱা দেখা গৈছে।
ৰাহুল গান্ধীৰ লগতে অন্যান্য বিৰোধীৰ দলৰ মতে চৰকাৰে দাবী কৰাৰ দৰে লাডাখৰ বাস্তৱ পৰিস্থিতি শান্ত নহয়। আনকি চৰকাৰৰ ভাষ্য আৰু লাডাখৰ বাস্তৱ পৰিস্থিতিৰ মাজত মিল নাই।
যোৱা শনিবাৰে দুই দেশৰ সেনা বিষয়াৰ পৰ্যায়ৰ বৈঠক অনুষ্ঠিত হৈছিল যদিও লাডাখকলৈ উৎপত্তি হোৱা দুই দেশৰ মাজৰ বিবাদ নিষ্পত্তি হোৱা নাই বুলি জানিব পৰা গৈছে।
আজি প্ৰতিৰক্ষা মন্ত্ৰী ৰাজনাথ সিঙে ডিফেন্স ষ্টাফ আৰু সামৰিক বাহিনীৰ প্ৰধানৰ সৈতে লাডাখৰ পৰিস্থিতিৰ সন্দৰ্ভত এক বৈঠকত মিলিত হয়।
বৈঠকত যোৱা শনিবাৰে লাডাখত ভাৰতীয় আৰু চীনা সেনা বিষয়াৰ মাজত অনুষ্ঠিত সভাৰ বিষয়ে পৰ্যালোচনা কাৰ হয় বুলি বিশেষ সূত্ৰে জানিব পৰা গৈছে।
সেনাবাহিনীৰ সূত্ৰৰ মতে ভাৰতে দাবী জনাইছে যে এপ্ৰিলৰ শেষত নিয়্ন্ত্ৰণ ৰেখাৰ যি পৰিস্থিতি আছিল সেই পৰিস্থিতি দুই দেশে বজাই ৰাখক। অৰ্থাৎ চীনা সেনা মোতায়েন কমোৱাৰ লগতে পিছুৱাই নিয়ক।
ইয়াৰ পৰা নিশ্চিত হৈছে চীনা সেনাই নিয়্ন্ত্ৰণ ৰেখা পাৰ হৈ ইতিমধ্যে ভাৰতত প্ৰৱেশ কৰিছে।
এক ভাৰ্চুৱেল জনসভাত প্ৰতিৰক্ষা মন্ত্ৰী ৰাজনাথ সিঙে কয় ‘ৰাহুল গান্ধী আৰু বিৰোধী কোনো কোনোৱে ভাৰত-চীন সীমান্তত কি হৈ আছে সেয়া জানিব বিচাৰিছে। এই বিষয়ে প্ৰতিৰক্ষা মন্ত্ৰী হিচাপে মই যি ক’ম সেয়া সংসদত ক’ম।’
‘৬ জুনৰ বৈঠক খুব ইতিবাচক হৈছে। ভাৰত আৰু চীনে বৰ্তমান সংঘাত নিৰ্মূল কৰিবলৈ সন্মত হৈছে। মই আশ্বস্ত কৰিছো যে দেশ শক্তিশালী হৈয়ে আছে।’ প্ৰতিৰক্ষা মন্ত্ৰীয়ে আৰু কয়।
