আমেৰিকাৰ শুল্ক নীতিৰ যোগ্য প্ৰত্যুত্তৰ দিছে কমিউনিষ্ট চীনে। মঙলবাৰে চীনৰ বিত্ত মন্ত্ৰালয়ে এক বিবৃতি প্ৰকাশ কৰি আমেৰিকাৰ সামগ্ৰীৰ ওপৰত অতিৰিক্ত শুল্ক আৰোপ কৰাৰ কথা ঘোষণা কৰিছে।
উল্লেখ্য যে আজিৰ পৰা আমেৰিকাৰ ড’নাল্ড ট্ৰাম্প চৰকাৰে চীনৰ ওপৰত অতিৰিক্ত শুল্ক আৰোপ কৰিছে। ইয়াৰ ওলোটা বিবৃতিত চীনে কয় যে কিছুমান সামগ্ৰীৰ ওপৰত ১০ শতাংশ আৰু আন কিছুমানৰ ওপৰত ১৫ শতাংশ শুল্ক বৃদ্ধি কৰা হ’ব। অহা ১০ মাৰ্চৰ পৰা সেয়া কাৰ্যকৰী হ’ব।
আমেৰিকাৰ শুল্ক যুদ্ধৰ প্ৰতিশোধ হিচাপে চীনে আমেৰিকাৰ কেইবাটাও সামগ্ৰীৰ ওপৰত অতিৰিক্ত শুল্ক আৰোপ কৰাৰ সিদ্ধান্ত গ্ৰহণ কৰিছে। সেই তালিকাত খাদ্য সামগ্ৰীৰ লগতে কাপোৰ-কানিও অন্তৰ্ভুক্ত কৰা হৈছে।
চীনৰ বিত্ত মন্ত্ৰালয়ৰ সূত্ৰ অনুসৰি চীনৰ শুল্ক নীতিত কৃষিজাত সামগ্ৰীৰ পৰা আৰম্ভ কৰি খাদ্য সামগ্ৰীলৈকে সকলোকে সামৰি লোৱা হ’ব। চীনে আমেৰিকাৰ সামগ্ৰী যেনে ছয়াবিন, বজ্ৰা, গাহৰিৰ মাংস, সাগৰীয় খাদ্য, ফল-মূল, শাক-পাচলি আৰু দুগ্ধজাত সামগ্ৰীৰ ওপৰত অতিৰিক্ত ১০ শতাংশ আমদানি শুল্ক আৰোপ কৰিছে।
চীনৰ বিত্ত মন্ত্ৰালয়ে কয় যে কুকুৰাৰ মাংস, ঘেঁহু, কুঁহিয়াৰ, কপাহকে ধৰি আমেৰিকাৰ সামগ্ৰীৰ ওপৰত অতিৰিক্ত ১৫ শতাংশ আমদানি শুল্ক আৰোপ কৰা হৈছে। ৰয়টাৰৰ বাতৰি অনুসৰি চীনে আমেৰিকাৰ ২৫টা কোম্পানীৰ ৰপ্তানি আৰু বিনিয়োগৰ ক্ষেত্ৰতো কেইবাটাও নিষেধাজ্ঞা আৰোপ কৰিবলৈ সাজু হৈছে।
প্ৰসংগক্ৰমে মঙলবাৰৰ পৰা চীন, মেক্সিকো, কানাডাৰ ওপৰত আমেৰিকাৰ অতিৰিক্ত শুল্ক আৰোপ কৰা হৈছে। যদিও পূৰ্বে ঘোষণা কৰা হৈছিল, একেদিনাই চীনেও আমেৰিকাৰ সামগ্ৰীৰ ওপৰত অতিৰিক্ত ১০-১৫ শতাংশ আমদানি শুল্ক আৰোপ কৰিছে, যাৰ ফলত আন্তঃৰাষ্ট্ৰীয় বাণিজ্য যুদ্ধ আনুষ্ঠানিকভাৱে মুকলি হ’ল।
উল্লেখ্য যে যোৱা সোমবাৰে কানাডাইও আমেৰিকাৰ পৰা আমদানি কৰা সামগ্ৰীৰ ওপৰত প্ৰায় ২৫ শতাংশ অতিৰিক্ত শুল্ক ঘোষণা কৰিছিল। কানাডাৰ পথ অনুসৰণ কৰি চীনেও ১০ মাৰ্চৰ পৰা নতুন শুল্ক নীতি আৰম্ভ কৰিবলৈ সাজু হৈছে।
আমেৰিকাৰ ওপৰত প্ৰতিশোধ হিচাপে কানাডা চৰকাৰে আজিৰ পৰা কাৰ্যকৰী হোৱাকৈ প্ৰায় ১৫৫ বিলিয়ন কানাডিয়ান ডলাৰৰ ওপৰত আমদানি শুল্ক আৰোপ কৰিছে। সোমবাৰেই দেশৰ বিদায়ী প্ৰধানমন্ত্ৰী জাষ্টিন ট্ৰুডোৱে ঘোষণা কৰে যে যদিহে ট্ৰাম্প প্ৰশাসনে নিজৰ সিদ্ধান্তত অটল থাকে তেন্তে কানাডাইও আমেৰিকাৰ সামগ্ৰীৰ ওপৰত ২৫ শতাংশ অতিৰিক্ত শুল্ক আৰোপ কৰিব।
