ভাৰতৰ চিৰবৰী ৰাষ্ট্ৰ চীনে ভাৰতৰ সংকটৰ সময়ত দেশ খনক সহায় কৰিবলৈ আগবাঢ়ি আহিছে।
ক’ৰ’নাৰ সংহাৰে বিধ্বস্ত কৰা ভাৰতবৰ্ষক সকলো শত্ৰুতা পাহৰি চীনে আগবঢ়াইছে ২৫ হাজাৰটা অক্সিজেন কনচেণ্ট্ৰেটৰ।ভাৰতত থকা চীনৰ ৰাষ্ট্ৰদূত ছান ইউদনে আজি এই কথা প্ৰকাশ কৰিছে।
তেওঁ কয় যে এই অক্সিজেন কনচেণ্ট্ৰেটৰ ভাৰতলৈ সৰবৰাহ কৰাৰ বাবে চীনৰ কৰ্মীসকলে ৰাতিক দিন কৰি কাম কৰি আছে। উল্লেখ্য ক’ৰ’নাৰ দ্বিতীয়টো ঢৌৱে সংহাৰৰ সৃষ্টি কৰা ভাৰতৰ ৰাজধানী দিল্লীত অক্সিজেনৰ অভাৱতে বহু ৰোগীৰ মৃত্যু ঘটিছে।
এনে পৰিস্থিতিত ভাৰতে বিদেশৰ পৰা অক্সিজেন ৰপ্তানি কৰাৰ সিদ্ধান্ত ল’বলগীয়া হৈছে।বিপদৰ সময়ত ভাৰতক সহায় কৰিবলৈ আগবাঢ়ি আহিছে আমেৰিকাকে ধৰি বিশ্বৰ ৪০ খন দেশ।
ভাৰতত ক’ৰ’না পৰিস্থিতিৰ মোকাবিলা কৰিবলৈ বহু ৰাজ্যই লকডাউন ঘোষণা কৰিছে।কৰ’নাৰ দ্বিতীয়টো ঢৌত বিপৰ্যস্ত হৈ পৰিছে দিল্লীৰ পৰিস্থিতি। অক্সিজেনৰ অভাৱত বহু ৰোগীৰ মৃত্যু ঘটিছে।অৱশ্যে শেহতীয়াকৈ বাহিৰৰ ৰাজ্যৰ পৰা দিল্লীলৈ অক্সিজেনৰ সৰবৰাহ বঢ়াই তোলাৰ ফলত ৰাজ্য খনত অক্সিজেনৰ অভাৱ বহু পৰিমাণে দূৰ হৈছে।
দিল্লী চৰকাৰে এনে পৰিস্থিতিত অক্সিজেনৰ সৰবৰাহৰ প্ৰতি দৃষ্টি ৰাখিবলৈ নতুন প’ৰ্টেল মুকলি কৰিছে।
মুখ্যমন্ত্ৰী অৰবিন্দ কেজৰিৱালে এই প’ৰ্টেল সম্পৰ্কত কয়,’’আমি এটা পৰ্টেল আৰম্ভ কৰিছো। ইয়াত প্ৰতি দুঘন্টাৰ মূৰে মূৰে অক্সিজেনৰ আপডেট কৰা হ’ব। ইয়াৰ ফলত উৎপাদনকাৰী, সৰবৰাহকাৰী আৰু হাস্পাতালসমূহৰ অক্সিজেন মেনেজমেন্ট কাৰ্যকৰী হ’ব। কেন্দ্ৰ আৰু ৰাজ্য চৰকাৰে একেলগে কাম কৰিছে।‘’
