উপগ্ৰহীয় চিত্ৰত পূৰ্বতেই ধৰা পৰিছিল পাহাৰ কাটি, নদীৰ ওপৰত কালভাৰ্ট নিৰ্মাণ তথা ১৬টা সেনা শিৱিৰৰ ছবি।
ভাৰতীয় সেনাৰ সূত্ৰৰ খৱৰ অনুসৰি, চীনে সীমান্তত নিৰ্মাণৰ কাম বৃদ্ধিহে কৰিছে। গলৱান নদীৰ পাৰত ১৯টা শিৱিৰ স্থাপন কৰাৰ লগতে পকী ৰাস্তাও নিৰ্মাণ কৰিছে।
গলৱান উপত্যকাৰ পহৰাদাৰী পইন্ট ১৪’ৰ ওচৰত চীনৰ সেনাৰ শিৱিৰ স্থাপনকলৈয়েই ভাৰতীয় সেনাৰ সৈতে সংঘাতৰ সৃষ্টি হৈছিল।
কিন্তু তথাপি চীন পক্ষই ৰাস্তা নিৰ্মাণ তথা শিৱিৰ স্থাপনৰ কাম বন্ধ কৰা নাই।
সেনাৰ সূত্ৰই প্ৰকাশ কৰা মতে, গলৱান নদীৰ যিটো অঞ্চলত চীনৰ শিৱিৰসমূহ স্থাপন কৰা হৈছে সেয়া কৌশলগতভাৱে অত্যন্ত গুৰুত্বপূৰ্ণ।
ইয়াৰ পৰা চিধাচিধি ভাৰতীয় সেনাৰ শিৱিৰৰ ওপৰত চকু ৰাখিব পাৰিব চীনা সৈন্যই।
বাতৰি অনুসৰি, সেনাৰ এক বিষয়াৰ উদ্ধৃতিৰে কোৱা হৈছে যে চীনৰ সেনা ভাৰতীয় ভুখণ্ডৰ ভিতৰলৈ ১৪৯মিটাৰ সোমাই আহিছে।
উক্ত অঞ্চলত তম্বু টানি চীনৰ সেনা বহি পৰিছে। গোলাপী তিৰ্পালৰ পৰিৱৰ্তে ব্যৱহাৰ কৰিছে ক’লা তিৰ্পাল। চীনৰ সৈন্যসকলে বিশেষ ধৰণৰ পোছাকো পৰিধান কৰিছে। তেওঁলোকে তাত স্থায়ীভাৱে থকাৰ প্ৰস্তুতি লৈ আহিছে। পিছলৈ উভতি যোৱাৰ কোনো লক্ষণ দেখুওৱা নাই চীনৰ সেনাই।
ইপিনে, সেনাৰ সূত্ৰ অনুসৰি, ভাৰতীয় বিমান বাহিনীয়ে শ্ৰীনগৰ, জম্মুৰ চঞ্জুৱান আৰু দক্ষিণ কাশ্মীৰৰ পুলৱামাৰ পৰা ক্ৰমে সেনা তথা সা-সামগ্ৰীসমূহ লাডাখলৈ নিবলৈ লৈছে।
আনহাতে, সীমান্তত আন্ত:গাঁথনি নিৰ্মাণৰ কামত অধিক গুৰুত্ব দিয়াৰ কথা সদৰী কৰিছে কেন্দ্ৰীয় পথ পৰিবহন মন্ত্ৰী নীতিন গাডকাৰীয়ে।
তেওঁ উল্লেখ কৰিছে যে জম্মু-কাশ্মীৰ, অৰুণাচল প্ৰদেশ, উত্তৰাখণ্ড, ৰাজস্থান তথা হিমাচল প্ৰদেশৰ সীমান্ত অঞ্চলত বহুকেইটা ৰাস্তা নিৰ্মাণৰ কাম চলি আছে। প্ৰয়োজনত ৰাণৱে’ৰ কামত ব্যৱহাৰ কৰিব পৰাকৈ এনেকুৱা ১৭টা ৰাস্তা নিৰ্মাণৰ কামো চলাই থকা হৈছে।
