চৰ্ত আছিল যে মোবাইল ফোন ব্যৱহাৰ কৰিব নোৱাৰিব। সেই নিৰ্দেশ পালন কৰি এগৰাকী যুৱতীয়ে লাভ কৰিলে ১ লাখ টকাৰ পুৰস্কাৰ। মিছ ডং নামৰ যুৱতীগৰাকীয়ে ৮ ঘণ্টা ধৰি মোবাইল ফোন স্পৰ্শ নকৰাৰ বাবে এই বঁটা লাভ কৰে।
যোৱা ২৯ নৱেম্বৰত চীনৰ চংকিং মিউনিচিপালিটিৰ এখন মাৰ্কেটত অনুষ্ঠিত হৈছিল এই প্ৰতিযোগিতা। ১০০ জন আবেদনকাৰীৰ ভিতৰত মাত্ৰ ১০ জনক নিৰ্বাচিত কৰি প্ৰতিযোগিতা আৰম্ভ হয়। চৰ্ত আছিল যে প্ৰতিজন প্ৰতিযোগীয়ে কেৱল নিৰ্দিষ্ট বিচনাত শুই ৮ ঘণ্টা সময় কটাব লাগিব। মোবাইল, লেপটপ বা পেড আদি কোনো ইলেক্ট্ৰনিক যন্ত্ৰ স্পৰ্শ নকৰিব।
স্থানীয় সংবাদ মাধ্যমৰ সূত্ৰ অনুসৰি প্ৰতিযোগিতাৰ নিয়ম যথেষ্ট কঠোৰ আছিল। প্ৰতিজন প্ৰতিযোগীয়ে প্ৰথমে আয়োজকৰ ওচৰত নিজৰ মোবাইল বা অন্যান্য ইলেক্ট্ৰনিক যন্ত্ৰ জমা দিব লাগিছিল। জৰুৰী কাৰণত আয়োজকসকলে ফোন ব্যৱহাৰৰ অনুমতি দিছিল। সেইটোও আগৰ দিনৰ কিপেড ফোন আছিল। প্ৰতিযোগীসকলক মাত্ৰ পাঁচ মিনিটৰ বাবে শৌচাগাৰ ব্যৱহাৰ কৰিবলৈ দিয়া হৈছিল।
টোপনিৰ ক্ষেত্ৰতো নিয়ম কঠোৰ আছিল। প্ৰতিযোগীসকলে গভীৰ টোপনি বা কোনো উদ্বিগ্নতা দেখুৱাব নোৱাৰে, এই প্ৰতিযোগিতাত সেইটোৱেই আছিল নিয়ম। বেছিভাগ প্ৰতিযোগীয়ে কিতাপ পঢ়ি বা চকু মুদি জিৰণি লৈ সময় কটায়।
তাৰ ভিতৰত মিছ ডঙৰ টোপনিৰ গভীৰতা আটাইতকৈ কম আছিল আৰু তেওঁৰ উদ্বেগৰ মাত্ৰাও আনবোৰতকৈ বহু কম আছিল। ফলত তেওঁ ১০০ৰ ভিতৰত ৮৮.৯৯ নম্বৰ লাভ কৰে। ইয়াৰ পিছত তেওঁক বিজয়ী ঘোষণা কৰা হয় আৰু ১০ হাজাৰ ইউয়ান (ভাৰতীয় মুদ্ৰাত প্ৰায় ১ লাখ ১৬ হাজাৰ টকা) পুৰস্কাৰ মিছ ডঙৰ হাতত অৰ্পণ কৰা হয়।
