বিশ্বৰ ফুটবল অনুৰাগীৰ বাবে সুখবৰ। দীৰ্ঘ দিনৰ বিৰতিৰ পাছত পুনৰ ফুটবলৰ খেলপথাৰত ভৰি দিছে ডেনমাৰ্কৰ ফুটবল তাৰকা ক্ৰিষ্টিয়ান এৰিকচেন। ডেনমাৰ্কৰ সংবাদ মাধ্যমত প্ৰকাশ পাইছে এই খবৰ।
উল্লেখ্য যে চলিত বৰ্ষৰ মাজ ভাগত ফুটবলৰ জনপ্ৰিয় টুৰ্নামেণ্ট ইউৰো কাপত ফিনলেণ্ডৰ বিৰুদ্ধে খেলত অৱতীৰ্ণ হোৱাৰ কিছু সময় পিছতেই হাৰ্ট এটেকৰ সন্মুখীন হৈ খেলপথাৰত বাগৰি পৰিছিল এৰিকচেন।
এই ঘটনাই সমগ্ৰ ফুটবল জগতকে জোকাৰি গৈছিল। শোকত ভাগি পৰিছিল ফুটবল অনুৰাগী সকল। পিছত এৰিকচেনৰ স্বাস্থ্যৰ অৱস্থা উন্নত হোৱা বুলি চিকিৎসকে ঘোষণা কৰিছিল যদিও পুনৰ খেলপথাৰলৈ ঘূৰি অহাৰ ক্ষেত্ৰত অনিশ্চয়তাই দেখা দিছিল।
অৱশেষত বিশ্বৰ ফুটবল প্ৰেমীৰ মুখত হাঁহি বিৰিঙাই সকলো অনিশ্চয়তাৰ হেঙাৰ আঁতৰ কৰি ফুটবলৰ খেলপথাৰত ভৰি দিছে এৰিকচেনে। অৱশ্যে এতিয়ালৈকে কোনো ফুটবল খেলত ভাগ লোৱা নাই ডেনমাৰ্কৰ তাৰকা জনে। এটা ক্লাৱৰ সৈতে প্ৰশিক্ষণত অংশ লৈছে এৰিকচেনে।
ইটালীৰ ফুটবল ক্লাৱ ইণ্টাৰ মিলানৰ সৈতে চুক্তিবদ্ধ হৈ আছে এৰিকচেন। কিন্তু হৃদ ৰোগৰ আক্ৰমণৰ পিছত তেওঁক পেচমেকাৰ লগোৱা হৈছে। সেইবাবে ইটালীৰ ক্লাৱ টুৰ্নামেণ্ট ছিৰি এ-ত খেলিবলৈ অনুমতি দিয়া নহয় এৰিকচেনক।
তাৰ পৰিৱৰ্তে তেওঁ বৃহস্পতিবাৰে তেওঁৰ বাল্যকালৰ ক্লাব অডেঞ্চৰ সৈতে প্ৰশিক্ষণত অৱতীৰ্ণ হয়।
