হেংদাং নহয় বন্দুক লৈ সৰ্বা-হিমন্তক প্ৰত্যুত্তৰ দিবলৈ গাত শক্তি আছে অসমীয়া ডেকাৰ, মঙলবাৰে এই হুংকাৰ অসম অনুসূচিত জাতি যুৱ ছাত্ৰ পৰিষদৰ সভাপতি ৰুবুল দাসৰ।
“ক’লা পতাকা দেখুওৱা, বিভিন্ন গণতান্ত্ৰিক আন্দোলন পুলিছ-মিলিটেৰিৰ হতুৱাই দমন কৰিছে চৰকাৰখনে। প্ৰয়োজন হ’লে হেংদাং নহয়, হাতত বন্দুক উঠাই লৈ সৰ্বানন্দ, হিমন্ত বিশ্বক প্ৰত্যুত্তৰ দিবলৈ অসমীয়া ডেকাৰ গাত শক্তি আছে,” দীঘলীপুখুৰী পাৰৰ অৱস্থান ধৰ্মঘট থলীত মন্তব্য নাগৰিকত্ব বিধেয়কবিৰোধী ৭০টা সংগঠনৰ অন্যতম নেতাজনৰ।
দাসে লগতে কয় যে গণতান্ত্ৰিক আন্দোলনৰ ওপৰত অসমৰ যুৱ প্ৰজন্মই আস্থা আৰু বিশ্বাস হেৰুৱাই পেলাইছে আৰু অপ্ৰিয় হ’লেও সত্য এই কথা।
বিতৰ্কিত বিধেয়কখন গৃহীত কৰাবলৈ বিজেপি চৰকাৰৰ অহৰহ চেষ্টাৰ ফলত ইতিমধ্যে অসমৰ বহু যুৱকে হাতত অস্ত্ৰ তুলি লোৱা বুলি দাবী কৰি দাসে কয় চৰকাৰ এই দিশত আৰু আগবাঢ়িলে পৰিস্থিতি অধিক ভয়াৱহ হ’ব।
“হাতত অস্ত্ৰ অথবা বন্দুক লৈ আন্দোলন কৰিবলৈ ৰাষ্ট্ৰযন্ত্ৰই বাধ্য কৰাইছে। বিধেয়ক গৃহীত হোৱাৰ পাছত অসমৰ পৰিস্থিতি কিমান ভয়ংকৰ হ’ব সেই কথা বিজেপি চৰকাৰে গমি-পিতি চোৱা ভাল,” দাসে কয়।
গণতান্ত্ৰিক প্ৰতিবাদ নুবুজা বিজেপি চৰকাৰে মুখ্য মন্ত্ৰী বা মন্ত্ৰীসকলৰ ঘৰ ভাঙি দিয়া, গাড়ী জ্বলাই দিয়াৰ দৰে অগণতান্ত্ৰিক কাৰ্য্যসূচী ল’বলৈ বাধ্য কৰাইছে নেকি বুলিও প্ৰশ্ন কৰে দাসে।
