দেশৰ পৰৱৰ্তী মুখ্য ন্যায়াধীশৰ নাম ছুপাৰিশ কৰিলে ডি ৱাই চন্দ্ৰচুড়ে; পৰৱৰ্তী মুখ্য ন্যায়াধীশ হ’ব সঞ্জীৱ খান্না
দেশৰ পৰৱৰ্তী মুখ্য ন্যায়াধীশ হ’ব সঞ্জীৱ খান্না। নিয়ম অনুসৰি অৱসৰৰ পূৰ্বে মুখ্য ন্যায়াধীশ ডি ৱাই চন্দ্ৰচুড়ে কেন্দ্রক তেওঁৰ উত্তৰাধিকাৰীগৰাকীৰ নাম পৰামৰ্শ দিছে। তাৎপৰ্যপূৰ্ণভাৱে সঞ্জীৱ খান্নাই প্ৰথমবাৰৰ বাবে মুখ্য ন্যায়াধীশ হিচাপে কাৰ্যনিৰ্বাহ কৰিব। ইয়াৰ পূৰ্বে তেওঁ কোনো উচ্চ ন্যায়ালয়ৰ মুখ্য ন্যায়াধীশ হিচাপে কাৰ্যনিৰ্বাহ কৰা নাই।
১০ নৱেম্বৰত শেষ হ’ব মুখ্য ন্যায়াধীশ চন্দ্ৰচুড়ৰ কাৰ্যকাল। তাৰপিছতে মুখ্য ন্যায়াধীশৰ দায়িত্ব ল’ব ‘চিনিয়ৰ মষ্ট’ ন্যায়াধীশ সঞ্জীৱ খান্নাই। তেওঁ দেশৰ ৫১ সংখ্যক মুখ্য ন্যায়াধীশ হ’ব। অৱশ্যে মাত্ৰ ছমাহ তেওঁ সেই পদত থাকিব। ২০২৫ চনৰ ১৩ মে’ত তেওঁ অৱসৰ লোৱাৰ কথা।
উচ্চতম ন্যায়ালয়ৰ কলেজিয়ামৰ নিয়ম অনুসৰি মুখ্য ন্যায়াধীশে অৱসৰৰ পূৰ্বে তেওঁৰ উত্তৰাধিকাৰীৰ নামৰ পৰামৰ্শ দিয়ে। কেন্দ্ৰীয় চৰকাৰে এই প্ৰস্তাৱত সন্মতি প্ৰকাশ কৰে। এইবাৰো ন্যায়াধীশ চন্দ্ৰচুড়ে কেন্দ্ৰলৈ প্ৰেৰণ কৰিছে পৰামৰ্শ।
ন্যায়াধীশ সঞ্জীৱ খান্নাই ৪ দশকৰো অধিক সময় ধৰি আইনী বৃত্তিৰ সৈতে জড়িত হৈ আছে। ১৯৮৩ চনত দিল্লীৰ তিছ হাজাৰী আদালতত অধিবক্তা হিচাপে কাম কৰিবলৈ আৰম্ভ কৰে।
২০০৫ চনত তেওঁ দিল্লী উচ্চ ন্যায়ালয়ৰ অতিৰিক্ত ন্যায়াধীশ হিচাপে নিযুক্তি লাভ কৰে। এবছৰৰ পাছত তেওঁ দিল্লী উচ্চ ন্যায়ালয়ৰ স্থায়ী ন্যায়াধীশ পদলৈ উন্নীত হয়।
ন্যায়াধীশ খান্নাই ২০১৯ চনৰ ১৮ জানুৱাৰীত উচ্চতম ন্যায়ালয়ৰ ন্যায়াধীশ হিচাপে নিযুক্তি লাভ কৰিছিল।
উল্লেখ্য যে উচ্চতম ন্যায়ালয়ৰ ন্যায়াধীশ হোৱাৰ আগতে তেওঁৰ কোনো উচ্চ ন্যায়ালয়ৰ মুখ্য ন্যায়াধীশ হিচাপে অভিজ্ঞতা নাছিল। ফলত ন্যায়াধীশ খান্নাই প্ৰথমবাৰৰ বাবে মুখ্য ন্যায়াধীশ হিচাপে কাৰ্যনিৰ্বাহ কৰিব।
ন্যায়াধীশ খান্নাই বিগত পাঁচ বছৰত উচ্চতম ন্যায়ালয়ত কেইবাটাও গুৰুত্বপূৰ্ণ ৰায়দান কৰিছে। ইয়াৰ ভিতৰত চেন্ট্ৰেল ভিষ্টা প্ৰকল্পত সন্মতি দিয়াটোও অন্তৰ্ভুক্ত। লগতে সংবিধানৰ ৩৭০ নং অনুচ্ছেদ বাতিলৰ বৈধতা আৰু নিৰ্বাচনী বণ্ড বাতিলৰ গোচৰো আছে।