অৱসৰৰ মুহূৰ্তত দাক্ষিণাত্যৰ মন্দিৰত পত্নীৰ সৈতে পূজা আগবঢ়ালে মুখ্য ন্যায়াধীশ ৰঞ্জন গগৈয়ে
দেশৰ মুখ্য ন্যায়াধীশ ৰঞ্জন গগৈয়ে দেওবাৰে অৱসৰৰ দিনটোত পুৱা তিৰুপতিৰ প্ৰভু ভেংকটেশ্বৰ মন্দিৰত পূজা আগবঢ়ায়।
পৰিয়ালৰ সৈতে তেওঁৰ এই ভ্ৰমণত মুখ্য ন্যায়াধীশগৰাকীক বেদজ্ঞ পণ্ডিতসকলে দাক্ষিণাত্যৰ মেলাম সংগীতৰ সৈতে বৈদিক মন্ত্ৰ পাঠেৰ মুল প্ৰৱেশদ্বাৰলৈ আদৰি নিয়া হয়।
মন্দিৰটোত পূজা-সেৱা আগবঢ়োৱাৰ পাছত শীৰ্ষ মৰ্যাদাৰ ব্যক্তিগৰাকীক মন্দিৰ কৰ্তৃপক্ষই প্ৰসাদৰ লগতে প্ৰভু ভেংকটেশ্বৰৰ এখন লেমিনেশ্যন কৰা ফটো অৰ্পন কৰে।
মুখ্য ন্যায়াধীশগৰাকীৰ এই মন্দিৰ দৰ্শনৰ সময়ত তেওঁৰ সৈতে উপস্থিত থাকে অন্ধ্ৰ প্ৰদেশৰ আৰক্ষী সঞ্চালক প্ৰধান আৰ পি ঠাকুৰ, জিলা উপায়ুক্ত প্ৰদ্যুন্ম, জিলা দণ্ডাধীশ জুনেইড আহমেদ মৌলানাৰ লগতে বালাজীৰ অভ্যৰ্থনা শাখাৰ বিষয়াসকল।
ইয়াৰ পূৰ্বে শনিবাৰে মুখ্য ন্যায়াধীশ ৰঞ্জন গগৈয়ে তেওঁৰ পত্নীৰ সৈতে তিৰুমালা বালাজী মন্দিৰ দৰ্শন কৰে।
তেওঁলোকে তাত “সহস্ৰ দীপলংকাৰন সেৱা’ত অংশ লয় আৰু পাছত “বহনা সেৱা’ত উপস্থিত থাকে য’ত “গোঁসাই’ক শোভাযাত্ৰাৰ মাজেৰে মন্দিৰ চৌহদৰ থকা চাৰিটা পৱিত্ৰ ৰাস্তাৰে লৈ যোৱা হয়।
স্থানীয় পৰম্পৰা অনুসৰি, মুখ্য ন্যায়াধীশগৰাকীয়ে প্ৰথমতে বৰাহ স্বামী মন্দিৰত পূজা আগবঢ়ায় আৰু তাৰ পাছতে প্ৰভু বালাজীৰ “দৰ্শন’ কৰে।
ইয়াতো মন্দিৰ কৰ্তৃপক্ষ তথা পুৰোহিতসকলে মুখ্য ন্যায়াধীশগৰাকীক প্ৰৱেশৰ সময়তে আনুষ্ঠানিক আদৰণি জনায়। “দৰ্শন’ৰ পাছতে তেওঁলোকে বৈদিক মন্ত্ৰৰ উচ্চাৰণেৰ মাজেৰে আশীৰ্বাদ দিয়ে।
উল্লেখ্য যে মুখ্য ন্যায়াধীশ ৰঞ্জন গগৈয়ে আজি অৰ্থাৎ ১৭ নৱেম্বৰত অৱসৰ গ্ৰহণ কৰিব।