দিল্লীৰ মুখ্য মন্ত্ৰী অৰবিন্দ কেজৰিৱালে বৃহস্পতিবাৰে লোকসভা আৰু ৰাজ্যসভাৰ সাংসদ সকলৰ সৈতে ভিডিঅ’ কনফাৰেন্সিঙৰ সহায়ত দিল্লীৰ কোভিড বিৰুদ্ধে যুদ্ধৰ বিষয়ে আলোচনা কৰে।
”ক’ৰ’না বিৰোধী যুদ্ধত দিল্লী মডেল সফল হৈছে কাৰণ দিল্লীৰ সকলো দল আৰু সদস্যই ৰাজনীতিৰ উৰ্দ্ধলৈ গৈ সন্মিলিতভাৱে কাম কৰিছে,” মুখ্য মন্ত্ৰী কেজৰিৱালে কয়।
দিল্লীত বৰ্তমান সময়ত ১৭,২৩৫ গৰাকী সক্ৰিয় কোভিড ৰোগীয়ে বিভিন্ন চিকিৎসালয়ত চিকিৎসা গ্ৰহণ কৰি আছে।
উল্লেখযোগ্য যে, দিল্লীত বৰ্তমানলৈ ১,২০,১০৭ গৰাকী লোক ক’ৰ’না ভাইৰাছৰ দ্বাৰা সংক্ৰমিত হোৱাৰ বিপৰীতে ৩৫৭১ গৰাকী লোকে ক’ৰ’নাৰ সংক্ৰমণৰ ফলত প্ৰাণ হেৰুৱাইছে।
বিগত ২৪ ঘণ্টাত দিল্লীত ১৪৬২ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে।
আনহাতে, দিল্লীত ক’ৰ’না ভাইৰাছৰ পৰা আৰোগ্য লাভ কৰা লোকৰ হাৰ ৮২ শতাংশলৈ বৃদ্ধি পাইছে।
দিল্লীত ক’ৰ’না ভাইৰাছৰ বৰ্দ্ধিত সংক্ৰমণৰ পাছতে কেন্দ্ৰ চৰকাৰ আৰু দিল্লী চৰকাৰে দিল্লীত দেশৰ ভিতৰত সৰ্ববৃহৎ কোভিড কেয়াৰ কেন্দ্ৰ গঢ়ি তুলিছিল।
