হাতীগাঁওস্থিত মাডাৰ্ছ অল্ড এজ হোম পৰিচালনাৰ ক্ষেত্ৰত শেহতীয়াকৈ সৃষ্টি হোৱা বেমেজালিৰ ঘটনা দৃষ্টিগোচৰ হৈছে মুখ্যমন্ত্ৰী ডঃ হিমন্ত বিশ্ব শৰ্মাৰ।
বৃদ্ধাৱাসখনত সংঘটিত সমগ্ৰ ঘটনাৰাজিৰ তদন্ত কৰি ৭২ ঘণ্টাৰ ভিতৰত প্ৰতিবেদন দাখিল কৰিবলৈ কামৰূপ (মহানগৰ) জিলাৰ উপায়ুক্তক মুখ্যমন্ত্ৰীয়ে নিৰ্দেশ দিছে।
মাডাৰ্ছ অল্ড এজ হোমৰ শেহতীয়া পৰিস্থিতি ব্যক্তিগতভাৱে তদাৰক কৰিবৰ বাবে সমাজ কল্যাণ মন্ত্ৰী অজন্তা নেওগক মুখ্যমন্ত্ৰীয়ে নিৰ্দেশ প্ৰদান কৰিছে।
উল্লেখ্য মাডাৰ্ছ অল্ড এজ হোম পৰিচালনাৰ সৈতে জৰিতসকলৰ মাজত নানান বিষয়কলৈ মতানৈক্যৰ সৃষ্টি হোৱাৰ ফলতে বৃদ্ধাশ্ৰম খন বন্ধ হৈ পৰাৰ উপক্ৰম ঘটিছিল।
ফলত ৯ বছৰ পুৰণি বৃদ্ধাশ্ৰম খনত থকা আইতাসকলে চৰম অনিশ্চয়তাৰ মাজেৰে সময় পাৰ কৰিবলগীয়া হৈছে।
মাডাৰ্ছ অল্ড এজ হোম পৰিচালনাৰ ক্ষেত্ৰত শেহতীয়াকৈ সৃষ্টি হোৱা বেমেজালি দূৰ কৰাৰ বাবে মুখ্যমন্ত্ৰী হিমন্ত বিশ্ব শৰ্মাই তৎপৰতা প্ৰদৰ্শন কৰাত এতিয়া বহুতে আশাৰ ৰেঙণি দেখিবলৈ পাইছে।
