কিছুদিন পূৰ্বে সংঘটিত চিকিৎসক আক্ৰমণৰ ঘটনাক লৈ পুনৰ সৰৱ হৈ পৰিছে মুখ্যমন্ত্ৰী ড০ হিমন্ত বিশ্ব শৰ্মা।
বিশ্ব পৰিবেশ দিৱসৰ দিনাই গুৱাহাটী চিকিৎসা মহাবিদ্যালয় হাস্পাতালত চিকিৎসাধীন হৈ থকা লংকা কাণ্ডৰ চিকিৎসক ডাঃ সেউজ কুমাৰ সেনাপতিক সাক্ষাৎ কৰে মুখ্যমন্ত্ৰীয়ে।
সাক্ষাৎ কৰি ডাঃ সেউজ সেনাপতি তথা তেওঁৰ পৰিয়ালক সান্তনা দিয়াৰ লগতে মুখ্যমন্ত্ৰীয়ে ডাঃ সেনাপতিক জনায় যে তেওঁ সুস্থ হোৱাৰ পাছত তেওঁ যিখন চিকিৎসালয়ত কাম কৰিব বিচাৰে তেওঁ তাতেই নিজৰ কৰ্ম আগবঢ়াব পাৰিব।
সাংবাদিকৰ ওচৰত মুখ্যমন্ত্ৰীয়ে উল্লেখ কৰে যে “চিকিৎসক আক্ৰমণ কৰাতো কোনো ভাল কাম নহয়। কোনোবাই যদি এই কাম কৰে তেনেহ’লে তেওঁলোকে কঠোৰ শাস্তিৰ সন্মুখীন হ’ব লগীয়া হ’ব।‘’
সেইবাবে মই সকলোকে আহ্বান জনাও যাতে এনেকুৱা কাম কোনেও দুনাই নকৰে।
যিসকল লোকক ইতিমধ্যে গ্ৰেপ্তাৰ কৰা হৈছে তেওঁলোকক আইনগতভাবে ব্যৱস্থা ল’বলৈ আৰক্ষীক দায়িত্ব দিয়াৰ কথাও সদৰী কৰে মুখ্যমন্ত্ৰীয়ে।
মুখ্যমন্ত্ৰীয়ে কয়, ‘’ক’ভিডৰ জটিল পৰিস্থিতিৰ মাজতো নিষ্ঠাৰে সেৱা আগবঢ়োৱা চিকিৎসক আৰু চিকিৎসা কৰ্মীৰ সৈতে চৰকাৰ সদায় আছে আৰু থাকিব।‘’
