সন্ত্ৰাসবাদী আক্ৰমণত বিধ্বস্ত হৈ পৰিছে পেহেলগাম। জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই মঙলবাৰে তাত কেবিনেট বৈঠক অনুষ্ঠিত কৰিছে।
শ্ৰীনগৰৰ অসামৰিক সচিবালয় বা মুখ্যমন্ত্ৰীৰ বাসগৃহত নহয়, পেহেলগামৰ ৰিজ’ৰ্টত অনুষ্ঠিত হ’ব এই বৈঠক। এই বৈঠকত জম্মু-কাশ্মীৰৰ কেবিনেটৰ লগতে অসামৰিক আৰু আৰক্ষীৰ শীৰ্ষ বিষয়াসকলে অংশগ্ৰহণ কৰাৰ সম্ভাৱনা আছে।
সূত্ৰ অনুসৰি পেহেলগামত সংঘটিত সন্ত্ৰাসবাদী আক্ৰমণৰ পিছত পৰ্যটকৰ আস্থা ঘূৰাই অনাৰ লগতে কাশ্মীৰলৈ ঘূৰি আহিবলৈ উৎসাহিত কৰাৰ উদ্দেশ্যে এই বৈঠকৰ আয়োজন কৰা হৈছে।
বুধবাৰে গুলমাৰ্গত ওমৰ আব্দুল্লাৰ নেতৃত্বত উচ্চ পৰ্যায়ৰ কেবিনেট বৈঠক অনুষ্ঠিত হ’ব। সেই বৈঠকত প্ৰশাসনিক সচিব আৰু প্ৰশাসনৰ অন্যান্য উচ্চ পদস্থ বিষয়াসকল উপস্থিত থাকিব। এই বৈঠকত বিভিন্ন উন্নয়নমূলক কামৰ লগতে ৰাইজৰ সৈতে জড়িত বিভিন্ন বিষয়ৰ ওপৰত আলোচনা কৰা হ’ব।
মুখ্যমন্ত্রীৰ উপদেষ্টা নাছিৰ আছলাম ৱানীয়ে কয় যে আমিয়েই যদি পেহেলগামৰ এই ঠাইবোৰলৈ নাযাওঁ, তেন্তে আৰু কোনে যাব? এই বৈঠকৰ দুটা উদ্দেশ্য। প্ৰথমে আমি পেহেলগামৰ বিভিন্ন ঠাই ভ্ৰমণ কৰি তাৰ পৰা পোনপটীয়াকৈ তথ্য সংগ্ৰহ কৰিম। দ্বিতীয়তে, বৰ্তমানৰ পৰিস্থিতিত আমি যে পেহেলগামলৈ যাম সেয়াও যথেষ্ট গুৰুত্বপূৰ্ণ। ইয়াৰ ফলত মানুহৰ মনত আস্থা আৰু বৃদ্ধি পাব।
এজন বিষয়াই কয় যে আশাকৰোঁ এই বৈঠকৰ পিছত পৰ্যটকসকলে অধিক আত্মবিশ্বাস লাভ কৰিব যে উপত্যকাটো পুনৰ ভ্ৰমণ কৰাটো নিৰাপদ।
অৱশ্যে শ্ৰীনগৰৰ বাহিৰত ওমৰ আব্দুল্লা আৰু তেওঁৰ মন্ত্ৰীসভাৰ বৈঠক এইবাৰেই প্ৰথম নহয়। মুখ্যমন্ত্ৰী হিচাপে তেওঁ ইয়াৰ পূৰ্বে ২০১২ চনৰ মে’ মাহত টাংধৰত নিয়ন্ত্ৰণ ৰেখাত এখন কেবিনেট বৈঠক অনুষ্ঠিত কৰিছিল।
