টকিঅ’ অলিম্পিকত উৰিষ্যাৰ পৰা দ্যুতি চান্দকে ধৰি কেইবাগৰাকীও খেলুৱৈয়ে ভাৰতক প্ৰতিনিধিত্ব কৰিব। টকিঅ’লৈ যোৱাৰ পূৰ্বে তেওঁলোকক উৎসাহিত কৰিলে ৰাজ্যখনৰ মুখ্যমন্ত্ৰী নবীন পাটনায়কে।
পদক বিজয়ী খেলুৱৈক বিশাল পৰিমানৰ আৰ্থিক পুৰস্কাৰ দিয়াৰ ঘোষণা কৰিলে মুখ্যমন্ত্ৰী পাটনায়কে। অৱশ্যে, পদক নাপালেও আৰ্থিক পুৰস্কাৰ দিয়া হ’ব।
নবূন পাটনায়কে জানিবলৈ দিছে যে অলিম্পিকত উৰিষ্যাৰ কোনো খেলুৱৈয়ে সোণ জিকিলে তেওঁক ৬কোটি টকা আগবঢ়োৱা হ’ব।
সেইদৰে কোনোৱে ৰূপ জিকিলে পাব ৪ কোটি টকা। আনহাতে, ব্ৰঞ্জ বিজয়ীক দিয়া হ’ব ২কোটি ৫০লাখ টকা।
তদুপৰি, অলিম্পিকত যিসকলে অংশ ল’ব তেওঁলোকক প্ৰত্যেককে ১৫লাখ টকা দিয়াৰ সিদ্ধান্ত লৈছে উৰিষ্যা চৰকাৰে।
বৃহস্পতিবাৰে টকিঅ’গামী দ্যুতি চান্দ, প্ৰমোদ ভগত, দীপ গ্ৰেছ এক্কা, নমিতা টপ্প’, বীৰেন্দ্ৰ লাক্ৰা, অমিত ৰুইদাসৰ সৈতে বাৰ্তালাপ কৰি তেওঁলোকক উৎসাহিত কৰে মুখ্যমন্ত্ৰী পাটনায়কে।
I would like to thank @Naveen_Odisha Sir for declaring Rs 6 cr, 4 cr and 2.5 cr for winning Gold, Silver and Bronze in Olympics. This type of announcement will boost us to perform better. @achyuta_samanta Sir@ianuragthakur Sir@sports_odisha pic.twitter.com/28b9MGnKNO
— Dutee Chand (@DuteeChand) July 8, 2021
অনুষ্ঠানত ৰাজ্যখনৰ ক্ৰীড়ামন্ত্ৰী টি কে বেহৰায়ো উপস্থিতি থাকি ক্ৰীড়াবিদ কেইগৰাকীক উৎসাহিত কৰে।
ইপিনে, ক্ৰীড়াবিদ কেইগৰাকীয়ে মুখ্যমন্ত্ৰীৰ আগত নিজৰ নিজৰ অনুভৱ ব্যক্ত কৰে আৰু তেওঁলোকক এনেদৰে উৎসাহিত কৰাৰ বাবে মুখ্যমন্ত্ৰীক কৃতজ্ঞতা জনায়।
তেওঁলোক আটায়ে টকিঅ’ অলিম্পিকৰ পৰা পদক জিনি দেশক গৌৰৱান্বিত কৰাৰ সংকল্পৰ কথা দোহাৰে।
