‘নিকা প্ৰশাসন’ৰ কথা কোৱা মুখ্য মন্ত্ৰী সৰ্বানন্দ সোণোৱাল নেতৃত্বাধীন বিজেপি চৰকাৰৰ তিনিটা বছৰ সম্পূৰ্ণ নৌহওতেই এতিয়া দুৰ্নীতিৰ অভিযোগে ৰাজ্যত তোলপাৰ লগাইছে। শেহতীয়াভাৱে পঞ্চায়ত আৰু গ্ৰামোন্নয়ন বিভাগৰ নিযুক্তিত ব্যাপক অনিয়মৰ অভিযোগৰ মুখ্য মন্ত্ৰীয়ে এজন আমোলক তদন্তৰ দায়িত্ব দিয়েই দায় সাৰিব বিচৰা কাৰ্যই চৰ্চা লাভ কৰিছে।
তদুপৰি, ‘দুৰ্নীতিৰ বিৰুদ্ধে শূন্য সহনশীল’ নীতি লোৱা বুলি দাবী কৰি অহা মুখ্য মন্ত্ৰী সোণোৱাল প্ৰকৃততে দুৰ্নীতি বিৰোধী স্থিতিত কিমান অটল তাক লৈও প্ৰশ্ন উত্থাপন হৈছে। কাৰণ পঞ্চায়ত আৰু গ্ৰামোন্নয়ন বিভাগৰ বিৰুদ্ধে উত্থাপিত অভিযোগ সন্দৰ্ভত মুখ্য মন্ত্ৰীয়ে উপায়হীন হৈহে এই তদন্তৰ ঘোষণা কৰা বুলি মন্তব্য কৰিছে লিবাৰেল ডেমক্ৰেটিক পাৰ্টি (এল ডি পি)য়ে।
মঙলবাৰে গুৱাহাটীৰ বেলতলাত থকা দলটোৰ মুখ্য কাৰ্যালয়ত এখন সংবাদমেল সম্বোধন কৰি এল ডি পিৰ সভাপতি গুণ গগৈয়ে কয়, ‘ৰাইজৰ হেঁচাত পৰিহে মুখ্য মন্ত্ৰী সৰ্বানন্দ সোণোৱালে তদন্ত ঘোষণা কৰিছে। কিন্তু এই এজনীয়া তদন্ত কমিটিক ৰাইজে আশ্বাসত ল’ব পৰা নাই।‘
গুণ গগৈয়ে লগতে বিভাগটোত নিযুক্তিৰ প্ৰক্ৰিয়াত সংঘটিত অনিয়মৰ অভিযোগ চি বি আই বা উচ্চস্তৰীয় তদন্ত কৰাৰো দাবী কৰে। ইয়াৰ উপৰিও তদন্ত প্ৰক্ৰিয়া সমাপ্ত নোহোৱালৈ এই নিযুক্তি বাতিল কৰাৰো দাবী জনায়।
দলটোৱে লগতে স্বচ্ছ আৰু নিকা প্ৰশাসনৰ প্ৰতিশ্ৰুতিৰে শাসনলৈ অহা চৰকাৰখনৰ পঞ্চায়ত আৰু গ্ৰামোন্নয়নৰ নিযুক্তিত হোৱা দুৰ্নীতি আৰু স্বজন-তোষণে মিথ্যাচাৰী আৰু প্ৰৱঞ্চনাৰ স্বৰূপটো উদঙাই দিয়া বুলিও মন্তব্য কৰে।
ইপিনে, ৯৪৫ টা পদৰ বিপৰীতে প্ৰায় ১ লাখ ৮০ হাজাৰ প্ৰাৰ্থীয়ে পৰীক্ষাত অৱতীৰ্ণ হোৱা পৰীক্ষাটোত সংঘটিত হোৱা খেলিমেলিৰ পাছত চি আই ডিৰ তদন্তত কেতবোৰ বিসংগতিৰ তথ্য প্ৰকাশ পাইছিল। কিন্তু সেই সমূহক আওকান কৰি বিভাগটোৱে ফলাফল ঘোষণা আৰু নিযুক্তি প্ৰদান কৰা কাৰ্যৰো এল ডি পিয়ে বিৰোধিতা কৰে।
