প্ৰাক্তন বিজেপি মন্ত্ৰী তপন গগৈয়ে সাংবাদিকৰ প্ৰশ্নত অন্য উত্তৰ, অৰ্থাৎ সংগতিহীন উত্তৰ দিয়াৰ দৰে কাণ্ড কৰিলে মুখ্য মন্ত্ৰী সৰ্বানন্দ সোণোৱালেও।
দৰং জিলাৰ ছিপাঝাৰত ১৫ অক্টোবৰত বিজেপিয়ে অনুষ্ঠিত কৰা গান্ধী সংকল্প যাত্ৰাৰ এটা কাৰ্য্যসূচীৰ সময়ত সাংবাদিকে সুধিলে এটা প্ৰশ্ন আৰু সৰ্বানন্দ সোণোৱালে প্ৰশ্নটোৰ সৈতে সম্পৰ্ক নথকা কথা কৈ তাৎক্ষণিকভাৱে তাৰ পৰা আঁতৰি যোৱা দেখা গ’ল।
সাংবাদিকৰ প্ৰশ্ন আছিল ভেন্সাৰ বিদ্যালয়বিলাকৰ বিষয়ে আপোনালোকে যি প্ৰতিশ্ৰুতি দিছিল সেয়া ৰক্ষা নকৰিলে। এই বিষয়ত কি ক’ব?
মুখ্য মন্ত্ৰীয়ে বৰ ধুনীয়াকৈ সজাই-পৰাই আৰু কী-ৱৰ্ড কিছুমান লগাই তাৰ উত্তৰ দিয়ে এনেকৈ-
“এটা কথা ঠিক, আজি বাপুজীৰ প্ৰতি আপুনি, মই, আমি সকলোৱে বাপুজীৰ প্ৰতি শ্ৰদ্ধাঞ্জলি অৰ্পণ কৰিবৰ বাবে এই মহাস্থানত সমৱেত হৈছো আৰু আমি সকলোৱে মিলি বাপুজীৰ আদৰ্শেৰে আগন্তুক দিনত ভাৰতবৰ্ষৰ বুকুত অসমখনকো এখন আদৰ্শ ৰাজ্য হিচাপে প্ৰতিষ্ঠা কৰিম, স্বাস্থ্যৱান ৰাজ্য হিচাপে গঢ় দিম।”
উত্তৰটো দিয়েই মুখ্য মন্ত্ৰীয়ে সাংবাদিকৰ কাষৰ পৰা প্ৰায় দৌৰি আঁতৰি যোৱাৰ দৰে গুচি যায়। পৰিস্থিতিটো উপস্থিত সাংবাদিকসকলে টলকিবই নোৱাৰিলে।
বিজেপিৰ প্ৰাক্তন মন্ত্ৰী তথা বৰ্তমানৰ সাংসদ তপন গগৈয়েও এবাৰ নাগৰিকত্ব সংশোধনী বিধেয়ক সন্দৰ্ভত সাংবাদিকে সোধা প্ৰশ্নক একে ধৰণে কোনো সংগতি নথকা কথাৰে এৰাই চলিছিল আৰু তাৰ ভিডিঅ’টো ছ’চিয়েল মিডিয়াত ভাইৰেল হৈছিল।
