আজি দেশজুৰি প্ৰধানমন্ত্ৰী নৰেন্দ্ৰ মোডীয়ে মুকলি কৰা ‘স্বচ্ছতাই সেৱা’ শীৰ্ষক অভিযানৰ অংশ হিচাপে গুৱাহাটীতো এই অভিযান আৰম্ভ কৰা হয়। মহানগৰীৰ বেলতলা তিনিআলিত পুৱা মুখ্যমন্ত্ৰী সৰ্বানন্দ সোনোৱালে আৰম্ভ কৰে এই অভিযান।
বিজেপিৰ ৰাজ্যিক সভাপতি ৰঞ্জিত দাস, কেন্দ্ৰীয় সম্পাদক অৰুণ সিঙকে ধৰি কেইবাজনো বিশিষ্ট ব্যক্তি এই অভিযানত উপস্থিত থাকে। পুৱা ৯-৩০ প্ৰধানমন্ত্ৰী মোডীয়ে ভিডিঅ’ কনফাৰেন্সিঙৰ জৰিয়তে এই অভিযানৰ আৰম্ভ কৰে।
ইপিনে, বেলতলাতো ভিডিঅ’ কংফাৰেন্সিঙৰ ব্যৱস্থা কৰা হয়। এই ভিডিঅ’ কনফাৰেন্সিঙৰ সময়ত মোডীয়ে দিয়া ভাষণৰ পোনপটীয়া সম্প্ৰচাৰ বেলতলাত প্ৰত্যক্ষ কৰে মুখ্যমন্ত্ৰী সৰ্বানন্দ সোনোৱালে। সোণোৱালৰ লগতে ৰাজ্যিক সভাপতি ৰঞ্জিত দাসেও মোডীৰ ভাষণ প্ৰত্যক্ষ কৰে।
আনহাতে, প্ৰধানমন্ত্ৰী শ্ৰী নৰেন্দ্ৰ মোডীৰ নেতৃত্বত সমগ্ৰ দেশজুৰি আৰম্ভ হোৱা ‘স্বচ্ছতাই সেৱা, ২০১৮’ কাৰ্যসূচীৰ অংশ হিচাবে মুখ্যমন্ত্ৰী সোণোৱালে বেলতলা বজাৰত জনসাধাৰণৰ সৈতে চাফাই অভিযানত অংশগ্ৰহণ কৰে।
উল্লেখযোগ্য যে ২ অক্টোবৰত মহাত্মা গান্ধীৰ ১৫০ সংখ্যক জন্ম জয়ন্তী উপলক্ষে শ্ৰদ্ধাঞ্জলি জনোৱাৰ উদ্দেশ্যে স্বচ্ছতাই সেৱা শীৰ্ষক এই অভিযান আৰম্ভ কৰা হৈছে। সমগ্ৰ দেশে মহাত্মা গান্ধীৰ স্বচ্ছ ভাৰতৰ সপোন বাস্তৱায়িত কৰাৰ লক্ষ্যেৰে পৰিষ্কাৰ-পৰিচ্ছন্নতাৰ দিশত এক শক্তিশালী জন আন্দোলন গঢ়ি তোলাৰ আশা ব্যক্ত কৰিছে প্ৰধানমন্ত্ৰী মোডীৰ লগতে মুখ্যমন্ত্ৰী সোণোৱালে।
