বিশ্বৰ প্ৰদূষণকাৰী তালিকাৰ শীৰ্ষস্থানত আছে জনপ্ৰিয় শীতল পানীয়ৰ কোম্পানী কোকাকোলা। কোকাকোলাৰ প্লাষ্টিকে প্ৰদূষণৰ ক্ষেত্ৰত সীমাৰেখা অতিক্ৰম কৰিছে।
শেহতীয়াকৈ পৰিৱেশ সংস্থা অ’চেনাই সকীয়াই দিছে যে কোকাকোলা প্লাষ্টিক প্ৰদূষণৰ শীৰ্ষত আছে, ২০৩০ চনৰ ভিতৰত ৬০২ মিলিয়ন কিলোগ্ৰাম আৱৰ্জনা সাগৰত প্ৰৱেশ কৰিব।
বুধবাৰে প্ৰকাশিত এক প্ৰতিবেদন পোহৰলৈ আহিছে এই তথ্য।
গৱেষকৰ মতে কোকাকোলাৰ দ্বাৰা উৎপাদন হোৱা এই বিপুল পৰিমাণৰ প্লাষ্টিক ১ কোটি ৮০ লাখ তিমিৰ পেট ভৰাই পেলাবলৈ যথেষ্ট। এই প্লাষ্টিকসমূহে পৰিৱেশৰ বৈচিত্ৰত সাংঘাটিক প্ৰভাৱ পেলাব।
শেহতীয়াকৈ প্লাষ্টিক প্ৰদূষণৰ ফলত মানৱ শৰীৰত কি প্ৰভাৱ পৰিব, সেই লৈ উদ্বেগ বাঢ়িছে। বিজ্ঞানীসকলে মাইক্ৰ’প্লাষ্টিকক কেন্সাৰ, বন্ধ্যাত্ব, হৃদৰোগৰ দৰে গুৰুতৰ স্বাস্থ্যজনিত বিপদৰ কাৰণ হিচাপে চিহ্নিত কৰিছে।
অ’চেনাৰ নীতি সঞ্চালক মেট লিটলজনে কয় যে কোকাকোলা হৈছে বিশ্বৰ সৰ্ববৃহৎ পানীয় কোম্পানী। ফলত সাগৰ আৰু পৰিবেশৰ ওপৰতো ইহঁতৰ কুপ্ৰভাৱ অতি বেছি।
২০২৪ চনতো ছায়েন্স এডভান্সেছ নামৰ আলোচনীখনত প্ৰকাশিত এক অধ্যয়ন অনুসৰি কোকাকোলাই বিশ্বৰ শীৰ্ষ ব্ৰেণ্ডেড প্লাষ্টিক প্ৰদূষক হিচাপে স্থান লাভ কৰিছে। তাৰ পিছতে আছে পেপচিকো, নেচলে, ডেনন, আৰু অলট্ৰিয়া।
ছায়েন্স এডভান্সেছৰ প্ৰতিবেদনখনত কোৱা হৈছে যে বিশ্বৰ ৫০ শতাংশতকৈ অধিক প্লাষ্টিক প্ৰদূষণৰ বাবে বিশেষকৈ ৫৬টা কোম্পানী দায়ী। ইয়াৰে মুঠ প্লাষ্টিক প্ৰদূষণৰ ১১ শতাংশৰ বাবে দায়ী কেৱল কোকাকোলা।
উল্লেখ্য যে ২০১৮ চনৰ পৰা ২০২৩ চনলৈকে কোকাকোলাৰ পেকেজিং তথ্য আৰু বিক্ৰী বৃদ্ধিৰ পূৰ্বাভাস অনুসৰি অ’চেনাই এক পৰিসংখ্যা প্ৰস্তুত কৰিছিল। এই পৰিসংখ্যা অনুসৰি, ২০৩০ চনৰ ভিতৰত কোম্পানীটোৰ বছৰি উৎপাদন কৰা প্লাষ্টিক ৪১৩ লাখ টনতকৈও অধিক হ’ব।
পৰিৱেশবিদসকলৰ মতে এই বিপুল পৰিমাণৰ প্লাষ্টিক প্ৰদূষণ হ্ৰাস কৰাৰ আটাইতকৈ ফলপ্ৰসূ উপায় হ’ল পুনৰ ব্যৱহাৰযোগ্য পেকেজিং প্ৰৱৰ্তন কৰা। ইয়াৰ বাবে বিশেষজ্ঞ সকলে পুনৰ ৫০ বাৰ ব্যৱহাৰ কৰিব পৰাকৈ কাঁচৰ বটল আৰু কমেও ২৫ বাৰ পুনৰ ব্যৱহাৰ কৰিব পৰা ডাঠ প্লাষ্টিক বটল ব্যৱহাৰ কৰাৰ পৰামৰ্শ দিছে যদিও কোম্পানীটোৱে বিশেষজ্ঞ সকলৰ এই কথাত গুৰুত্ব আৰোপ কৰা দেখিবলৈ পোৱা হোৱা নাই।
ইফালে ২০২২ চনত কোকাকোলাই স্বীকাৰ কৰিছিল যে পুনৰ ব্যৱহাৰযোগ্য পেকেজিং হৈছে আৱৰ্জনা হ্ৰাস কৰাৰ অন্যতম ফলপ্ৰসূ উপায়। তেতিয়া তেওঁলোকে ২০৩০ চনৰ ভিতৰত তেওঁলোকৰ ২৫ শতাংশ সামগ্ৰী পুনৰ ব্যৱহাৰযোগ্য কৰি তোলাৰ প্ৰতিশ্ৰুতি দিছিল। কিন্তু ২০২৪ চনৰ ডিচেম্বৰ মাহত প্ৰকাশিত শেহতীয়া বহনক্ষম উন্নয়ন পৰিকল্পনাত এই প্ৰতিশ্ৰুতি পূৰণ কৰাৰ কথা উল্লেখ্যেই কৰা নাছিল কোম্পানীটোৱে।
উল্লেখ্য যে খাৰুৱা তেল ব্যৱহাৰ কৰি প্লাষ্টিক উৎপাদন কৰা হয়, যিটো জলবায়ু পৰিৱৰ্তনৰ অন্যতম কাৰণ। অৱশ্যে শেহতীয়াকৈ কোকাকোলাই ব্ৰাজিল, জাৰ্মানী, নাইজেৰিয়া, আৰু আমেৰিকাৰ কিছু অংশত পুনৰ ব্যৱহাৰযোগ্য বটল ব্যৱস্থা সফলতাৰে ৰূপায়ণ কৰিছে। কিন্তু বিশ্বৰ আন আন দেশ সমূহত এই ব্যৱস্থা কাৰ্যত পৰিণত কৰিব পৰা নাই কোম্পানীটোৱে। যাৰ বাবে এতিয়া কোকাকোলা হৈ পৰিছে জলবায়ুৰ প্ৰতি নামি অহা এক ডাঙৰ ভাবুকি।
