এটা বিদ্যুৎ কেন্দ্ৰ (পাৱাৰ প্লেন্ট) নিৰ্মাণ কৰা হ’ব। সেইবাবেই মাটিৰ প্ৰয়োজন। কিন্তু সেই প্ৰকল্পৰ বাবে কৃষকৰ পৰা মাটি লৈ দিয়া হোৱা নাই কোনো ক্ষতিপূৰণ। বিহাৰত কোটি কোটি টকাৰ মাটি কাৰ্যতঃ বিনামূলীয়াকৈ প্ৰদান কৰা হৈছে প্ৰধানমন্ত্ৰী নৰেন্দ্ৰ মোদীৰ কৰ্পোৰেট বন্ধুক। বছৰত মাত্ৰ ১ টকাত! সেই ১০০০ একৰ মাটি ৩৩ বছৰৰ বাবে লিজত দিয়া হৈছে।
সোমবাৰে কংগ্ৰেছে মোডী চৰকাৰৰ বিৰুদ্ধে এনে বিস্ফোৰক অভিযোগ উত্থাপন কৰে। তীব্ৰ আক্ৰমণ কৰি কংগ্ৰেছৰ মুখপাত্ৰ পৱন খেৰাই দাবী কৰে যে বিহাৰৰ ভাগলপুৰৰ সেই ১০৫০ একৰ মাটিয়েই নহয়, সেই মাটিত থকা প্ৰায় ১০ হাজাৰ আম, লিচু আৰু চেগুন গছো মোডীৰ কৰ্পৰেট বন্ধুৱে লৈ ল’ব।
সেই মাটিত এটা বিদ্যুৎ কেন্দ্ৰ নিৰ্মাণ কৰা হ’ব। তাত উৎপাদিত বিদ্যুৎ বিহাৰৰ বাসিন্দাক প্ৰতি ইউনিটত ৬ টাকা ৭৫ পইচা মূল্যত বিক্ৰী কৰা হ’ব। এইটো ডাবল ইঞ্জিন চৰকাৰৰ পৰা ডাবল লুট! এইদৰে কংগ্ৰেছে চোকা আক্ৰমণেৰে মোডী চৰকাৰক কাঠগড়াত তুলিলে।
বিহাৰত আহি আছে বিধানসভা নিৰ্বাচন। ভোটাৰ তালিকাত বিশেষ গভীৰ নিৰীক্ষণ (SIR)ক লৈ ইতিমধ্যে বিৰোধীয়ে সৰৱ হৈ পৰিছে। নাগৰিকৰ ভোটাধিকাৰৰ বাবে ৰাজপথলৈ ওলাই আহিছে। এইবাৰ তেওঁলোকে ঘনিষ্ঠ উদ্যোগপতিসকলক মোডীৰ বিশেষ সুবিধাৰ বিষয়টোকো অস্ত্ৰ হিচাপে লৈছে।
সোমবাৰে কংগ্ৰেছৰ মিডিয়া বিভাগৰ মুৰব্বী পৱন খেৰাৰ আক্ৰমণৰ লক্ষ্য হৈ পৰে মোডী। কংগ্ৰেছ নেতাগৰাকীয়ে কয় যে ভাগলপুৰৰ মাটিখিনি মোডীৰ কৰ্পৰেট বন্ধুক দিয়া হৈছে, যাৰ হাতত এতিয়া দেশৰ প্ৰায়বোৰ বিমানবন্দৰ, বন্দৰ, খনি তুলি দিয়া হৈছে। উল্লেখ্যা যে লোকসভাৰ বিৰোধী দলপতি ৰাহুল গান্ধীয়ে যথেষ্ট দিনৰ পৰা এই বিষয়বোৰক লৈ সৰৱ হৈ আহিছে।
পৱন খেৰাৰ প্ৰশ্ন, দেশত আৰু বিনিয়োগকাৰী নাই নেকি? এই সকলোবোৰ সুবিধা কেৱল প্ৰধানমন্ত্ৰীৰ বন্ধুক কিয় দিয়া হয়? লীজৰ নামত ভাগলপুৰত যি পৰিমাণৰ মাটি দিয়া হৈছে সেয়া বিহাৰৰ গান্ধী মৈদানৰ দৰে ১৬খন খেলপথাৰ হ’ব। ২২৫খন ক্ৰিকেট ষ্টেডিয়াম নিৰ্মাণ কৰিব পৰা যাব। সেই মাটি ৭৭০ খন ফুটবল খেলপথাৰৰ সমান। কিয় সেই মাটি খেতিয়কৰ পৰা লৈ মাত্ৰ এটকাত দি দিয়া হ’ব?
২৪০০ মেগাৱাট শক্তিৰ এই বিদ্যুৎ কেন্দ্ৰ নিৰ্মাণৰ বাবে ২১,৪০০ কোটি টকা ব্যয় হ’ব। পৱন খেৰাই প্ৰশ্ন কৰে, প্ৰধানমন্ত্ৰীৰ একেজন ব্যৱসায়িক বন্ধুৱে কিয় বিজেপি শাসিত উত্তৰ প্ৰদেশত প্ৰতি ইউনিটত ৪ টকা আৰু মহাৰাষ্ট্ৰত ৩ টকাকৈ বিদ্যুৎ বিক্ৰী কৰিছে, আনহাতে বিহাৰত কিয় দাম দুগুণ?
তেওঁ কয়, এয়া দিন দুপৰতে ডকাইতি! গতিকে কংগ্ৰেছে কেৱল প্ৰতিবাদেই নহয়, বিহাৰত দলটোৱে ক্ষমতালৈ আহিলে এই প্ৰকল্পটো বাতিল কৰিব বুলিও মন্তব্য কৰে কংগ্ৰেছ নেতাগৰাকীয়ে।
