পেহেলগাম আক্ৰমণৰ প্ৰতিক্ৰিয়া স্বৰূপে চলোৱা অপাৰেচন সিন্দূৰ সফলতাৰ পিছতে ৰজনৈতিক মহলত চলিছে সৰৱ চৰ্চা। শেহতীয়া কৈ কংগ্ৰেছৰ জ্যেষ্ঠ নেতা তথা সাংসদ জয়ৰাম ৰমেশে বুধবাৰে বিজেপিৰ বিৰুদ্ধে ‘অপাৰেচন সিন্দূৰ’ক ৰাজনীতিকৰণ কৰাৰ গুৰুতৰ অভিযোগ উত্থাপন কৰে। তেওঁ কয় যে ২৫ মে’ত, অপাৰেচন সিন্দুৰ আৰু পাকিস্তানৰ আগ্ৰাসনৰ বিৰুদ্ধে ভাৰতৰ সফল প্ৰতিক্ৰিয়াৰ বিষয়ে আলোচনাৰ বাবে প্ৰধানমন্ত্ৰী নৰেন্দ্ৰ মোদীয়ে এন ডি এ শাসিত ৰাজ্যৰ মুখ্যমন্ত্ৰীসকলৰ সৈতে বৈঠকত মিলিত হ’ব। কংগ্ৰেছৰ নেতাগৰাকীয়ে প্ৰশ্ন উত্থাপন কৰে, এইটো যদি ৰাজনীতিকৰণ নহয়, তেন্তে কি? কৰ্ণাটক, পশ্চিম বংগ, তামিলনাডু, তেলেংগানা, হিমাচল প্ৰদেশ, পঞ্জাব আৰু জম্মু-কাশ্মীৰৰ মুখ্যমন্ত্ৰীসকলৰ কি দোষ? কংগ্ৰেছে কেতিয়াও জাতীয় নিৰাপত্তাৰ বিষয়ক ৰাজনীতিকৰণ কৰা নাই। তেওঁ লগতে কয় যে প্ৰধানমন্ত্ৰী মোদীয়ে গুৰুতৰ প্ৰশ্নৰ উত্তৰ এৰাই চলিছে আৰু সৰ্বদলীয় বৈঠকত অংশগ্ৰহণ নকৰি কেৱল এন ডি এ নেতাসকলৰ সৈতে সাক্ষাৎ কৰিছে।
জয়ৰাম ৰমেশে ভাৰত আৰু পাকিস্তানৰ মাজত সামৰিক ব্যৱস্থা আৰু যুদ্ধবিৰতি চুক্তিৰ মধ্যস্থতাৰ বাবে আমেৰিকাৰ নেতাসকলৰ মন্তব্যৰ প্ৰতি চৰকাৰৰ মৌনতাৰো সমালোচনা কৰি কয় যে আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰত আৰু পাকিস্তানৰ মাজত যুদ্ধবিৰতিৰ কথা কিয় ক’লে? আমেৰিকাৰ বিদেশ মন্ত্ৰী ৰুবিঅ’ই দাবী কৰিছে যে তেওঁলোকৰ হস্তক্ষেপৰ বাবেই এই সংঘাত বন্ধ হৈছে। কিন্তু প্ৰধানমন্ত্ৰী মোদী আৰু বিদেশ মন্ত্ৰী ড° জয়শংকৰে এই বিষয়ত মুখ খোলা নাই। তেওঁ লগতে কয় বাৰে বাৰে প্ৰশ্ন কৰা হৈছে, কিন্তু কোনো উত্তৰ পোৱা নাই। কংগ্ৰেছে ঘোষণা কৰিছে যে তেওঁলোকে ১০-১৫খন ৰাজ্যত ‘জয় হিন্দ’ ৰেলীৰ আয়োজন কৰি চৰকাৰৰ পৰা এই প্ৰশ্নসমূহৰ উত্তৰ বিচাৰিব। ৰাহুল গান্ধীয়ে ১৬ মে’ত এই ৰেলীত অংশগ্ৰহণ কৰি প্ৰধানমন্ত্ৰীৰ মৌনতাৰ সন্দৰ্ভতো প্ৰশ্ন উত্থাপন কৰিব বুলি সদৰী কৰিছে।
লগতে কংগ্ৰেছে সশস্ত্ৰ বাহিনীৰ সন্ত্ৰাসবাদ বিৰোধী প্ৰচেষ্টাক সম্পূৰ্ণ সমৰ্থন জনায় বুলি উল্লেখ কৰি ৰমেশে কয়, তেওঁলোক সেনাবাহিনীৰ পিছফালে শিলৰ দৰে থিয় দি আছে। পাকিস্তানৰ বিৰুদ্ধে গ্ৰহণ কৰা প্ৰতিটো কাৰ্যক সমৰ্থন কৰি আহিছে। কংগ্ৰেছে সৰ্বদলীয় বৈঠকৰ দাবী জনাইছিল, কিন্তু দুখন বৈঠকৰ এখনতো প্ৰধানমন্ত্ৰী মোদী উপস্থিত নাছিল বুলি উল্লেখ কৰিছে। কংগ্ৰেছ সভাপতি মল্লিকাৰ্জুন খাৰ্গে আৰু ৰাহুল গান্ধীয়ে পেহেলগাম আক্ৰমণৰ বিষয়ে আলোচনাৰ বাবে সংসদৰ বিশেষ অধিৱেশনৰ দাবীত পত্ৰ প্ৰেৰণ কৰিছে বুলি সদৰী কৰিছে।
