কংগ্রেছৰ সংকটমোচনৰ বাবে ছোনিয়া গান্ধীৰ ছয় জনীয়া বিশেষ সমিতি! সম্ভৱ হ’বনে উত্থান?
শুকুৰবাৰে কংগ্ৰেছৰ অন্তৰ্ৱৰ্তীকালীন সভাপতি ছোনিয়া গান্ধীয়ে দলৰ ব্যাপক সাংগঠিক পৰিৱৰ্তন ঘটায়।
ছোনিয়া গান্ধীয়ে গোলাম নবী আজাদ, মতিলাল ভোহৰা, অম্বিকা ছোনি, মল্লিকাৰ্জুন খাৰ্গেক নিখিল ভাৰত কংগ্ৰেছ কমিটিৰ মহাসচিব পদৰ পৰা অঁতৰাই কংগ্ৰেছ ৱৰ্কিং কমিটিৰ পুনৰ্গঠন কৰে।
তদুপৰি, পি চিদাম্বৰম, ৰণদীপ সুৰজেৱালা, তাৰিক আনৱাৰ আৰু জিতেন্দ্ৰ সিঙক চি ডব্লিউ চিত নিযুক্তি দিয়া হৈছে।
ছোনিয়া গান্ধীয়ে সাংগঠনিক বিষয়ত সহায় কৰাৰ বাবে এখন ছয়জনীয়া সদস্যৰ বিশেষ সমিতিৰো গঠন কৰে।
আনহাতে, নিখিল ভাৰত কংগ্ৰেছ কমিটিৰ নিৰ্বাচনী সমিতিখনৰো পুনৰ্গঠন কৰা হৈছে। মধুসূদন মিস্ত্ৰীক ইয়াৰ অধ্যক্ষ হিচাপে নিযুক্তি দিয়া হৈছে।
ইয়াৰ সদস্য হিচাপে নিৰ্বাচিত কৰা হৈছে ৰাজেশ মিশ্ৰ, কৃষ্ণা আয়াৰ গৌড়া, এছ জতিমানি আৰু অৰবিন্দৰ সিং লাভলীক।
উল্লেখ্য যে কেন্দ্ৰীয় নিৰ্বাচনী সমিতিয়েহে পৰৱৰ্তী কংগ্ৰেছ অধ্যক্ষ নিৰ্বাচন কৰিব।
এ কে এন্টনি, আহমেদ পেটেল, অম্বিকা ছোনি, কে চি বেনুগোপাল, মুকুল ৱাচনিক আৰু ৰণদীপ সুৰজেৱালা বিশেষ সমিতিৰ সদস্য হ’ব।
বিশেষ সমিতিৰ ছয়গৰাকী সদস্যই সাংগঠনিক তথা পৰিচালনাৰ বিষয়ত ছোনিয়া গান্ধীক সহায় কৰিব।
কংগ্ৰেছৰ এই সাংগঠনিক সাল-সলনিত ৰাহুল গান্ধীৰ প্ৰভাৱ স্পষ্ট হৈ পৰিছে। পৰিৱৰ্তনৰ পাছত অধিকাংশ নতুন সচিবেই ৰাহুলৰ সহযোগী হিচাপে পৰিচিত।
ইয়াৰ ভিতৰত মহাসচিব সুৰজেৱালা, অজয় মাকন, জিতেন্দ্ৰ সিং আৰু কে চি বেনুগোপালো আছে।
কংগ্ৰেছৰ এই ব্যাপক সাল-সলনিৰ পাছত দলটোৰ উত্থান সম্ভৱ হ’বনে? এই প্ৰশ্নটোৰ সৈতে দলটোৰ অসন্তুষ্ট নেতাসকলৰ মানসিক স্থিতিৰ দিশটো গুৰুত্বপূৰ্ণ হৈ পৰিছে।
নিজকে দলত এলাগী বুলি জ্ঞান কৰি যদি তেওঁলোকে পুনৰ বিদ্ৰোহৰ পাতনি নেমেলে তেতিয়াহ’লে দেশৰ ৰাজনীতিৰ পৰিৱৰ্তিত পৰিস্থিতিত কংগ্ৰেছে সুযোগ গ্ৰহণ কৰাৰ অৱকাশ অৱশ্যে আছে।