বৰ্তমান ৰাজ্যৰ চৌদিশে পঞ্চায়ত নিৰ্বাচনক লৈ ৰাজনৈতিক দলসমূহে বিভিন্ন তৎপৰতা প্ৰদৰ্শন কৰি থকাৰ লগতে এই ক্ষেত্ৰত পিছ পৰি থকা নাই ৰাজ্যৰ অন্যতম থাওৰা সমষ্টিও। সমষ্টিটোৰ ২০খন পঞ্চায়ততে বিজেপিয়ে সাফল্য লাভ কৰিব বুলি সংবাদ মাধ্যমৰ আগত প্ৰকাশ কৰিছে থাওৰা সমষ্টিৰ বিধায়ক কুশল দুৱৰীয়ে।
এইকেইদিনত সমষ্টিৰ বিজেপি দলৰ বিষয়ববীয়া তথা কৰ্মীসকলে ঘৰে ঘৰে গৈ ভোটাৰ ৰাইজক আকৰ্ষিত কৰাৰ চেষ্টা চলোৱাৰ লগতে বিভিন্ন বৈঠকত মিলিত হোৱাও পৰিলক্ষিত হৈছে।
ইয়াৰ বিপৰীতে সমষ্টিটোৰ একাংশ ৰাজনৈতিক বিশ্লেষকে বিজেপি নেতৃত্বাধীন কেন্দ্ৰীয় চৰকাৰখনে অসমত বলপূৰ্বকভাৱে জাপি দিব বিচৰা নাগৰিকত্ব সংশোধনী বিধেয়ক ২০১৬, পেট্ৰল ডিজেল তথা নিত্য ব্যৱহৃত সামগ্ৰীৰ অত্যধিক মূল্যবৃদ্ধি, জিএছটি , অসহিষ্ণুতা আদি কাৰকে ৰাজ্যৰ পঞ্চায়ত নিৰ্বাচনত বিৰূপ প্ৰভাৱ পেলাব বুলি মন্তব্য কৰিছে।
ইফালে প্ৰধান আঞ্চলিক ৰাজনৈতিক দল অগপও থাওৰা সমষ্টিটোৰ ৪খন জিলা পৰিষদৰ লগতে ২০ খন গাঁও পঞ্চায়তত নিজাকৈ প্ৰাৰ্থী থিয় কৰায় নিৰ্বাচনৰ বাবে প্ৰস্তুতি আৰম্ভ কৰিছে। অগপৰ থাওৰা সমষ্টি সমিতিৰ সভাপতি লীলাজ্যোতি ফুকন, প্ৰাক্তন আছুনেতা তথা অগপৰ ভাতৃ সংগঠন যুৱ পৰিষদৰ কেন্দ্ৰীয় সম্পাদক প্ৰণৱ চেতিয়া, প্ৰাক্তন আছুনেতা তথা শিৱসাগৰ জিলা সমিতিৰ সম্পাদক কুশল দত্ত, প্ৰাক্তন আছুনেতা তথা অগপ নিতাইপুখুৰী আঞ্চলিক সমিতিৰ অন্যতম বিষয়ববীয়া জিতুমণি গগৈৰ নেতৃত্বত দিলটোৱে সমষ্টিটোত যুঁজিবলৈ সাজু হৈছে।
আনহাতে ২০১০ত অনুষ্ঠিত হোৱা পঞ্চায়ত নিৰ্বাচনত থাওৰাৰ প্ৰাক্তন বিধায়ক সুসান্ত বৰগোহাঁইৰ নেতৃত্বত কংগ্ৰেছ দলে ১৬ খন পঞ্চায়ত দখল কৰাৰ বিপৰীতে বিজেপিয়ে মাত্ৰ ৪ খন পঞ্চায়তহে লাভ কৰিছিল। সেই দিশলৈ লক্ষ্য কৰিলে কংগ্ৰেছ দলেও সমষ্টিটোত আন আন দলসমূহক যথেষ্ট প্ৰত্যাহ্বান আগবঢ়োৱাটো খাটাং।
তিনিওটা দলৰ প্ৰস্তুতি তথা শক্তিশালী ভোটাৰৰ সংখ্যালৈ লক্ষ্য কৰিলে আগন্তুক পঞ্চায়ত নিৰ্বাচনত থাওৰা সমষ্টিত যে এক আকৰ্ষণীয় যুঁজ হ’ব সেইয়া নিশ্চিত।
