“বিজেপি ক্ষমতাত আছে। টকা-পইচা আছে, আৰু তেওঁলোকে হিন্দু-মুছলমানৰ খেলটো খেলে, সেইটোৱে তেওঁলোকক বহুত সহায় কৰে”, বিজেপিয়ে সপ্তদশ লোকসভা নিৰ্বাচনত দেখুওৱা বৃহৎ জয় সন্দৰ্ভত এই মন্তব্য প্ৰাক্তন মুখ্য মন্ত্ৰী তৰুণ গগৈৰ।
নাগৰিকত্ব সংশোধনী বিধেয়কৰ প্ৰসংগত গগৈয়ে কয়, “তেওঁলোকে দেখুৱাব বিচাৰিছে যে মুছলমানৰ সংখ্যা ৰোধ কৰিবলৈ হ’লে হিন্দু বাংলাদেশীক আনিব লাগিব”।
ৰাজ্যখনত কংগ্ৰছৰ ফলাফল সন্দৰ্ভত যোৱাবাৰৰ যি পৰ্য্যায়ত আছিল সেই পৰ্য্যায়তে ফলাফল থাকিল বুলি মন্তব্য কৰে।
অৱশ্যে পূৰ্বৰ তুলনাত কংগ্ৰেছৰ ভোটৰ হাৰ বৃদ্ধি পোৱা বুলি জানিবলৈ দিয়ে জ্যেষ্ঠ কংগ্ৰেছ নেতাজনে।
এই সন্দৰ্ভত গগৈ মন্তব্য, “আমাৰ ভোটৰ হাৰটো বাঢ়িছে, গুৱাহাটীতে যোৱাবাৰ যিমান ভোটত হাৰিছিলো, এইবাৰ সিমান ভোটত হৰা নাই, যোৰহাটতো একেই। কিন্তু সেইটোৱেই আমাৰ সন্তুষ্টি বুলি ক’ব খোজা নাই। আমি ইয়াতকৈ আৰু ভাল হ’ব বুলি আশা কৰিছিলো।”
আনহাতে, ‘টকা-পইচা’ৰ খেল আৰু ‘মিছা কথা’ কোৱাত কংগ্ৰেছ দলটোৱে ফেইল মৰা বুলিও গগৈয়ে কয়।
“জিকিছে তেওঁলোক; মই নাই জিকা বুলি নকওঁ, আমি ফেইল মাৰিছো। আমি টকা-পইচাত ফেইল মাৰিছো, মিছা কথা কোৱাত ফেইল মাৰিছো। আজি তেওঁলোকে ৪খন হেলিকপ্টাৰ উৰুৱাইছে, আমি এখন উৰুৱাইছো।” গগৈয়ে কয়।
গগৈয়ে আৰু কয়, “আজিও মই মোদীক টেলিগ্ৰাম কৰি কৈছো, অসমৰ প্ৰতি যাতে তেওঁ দয়া কৰে আৰু অসমে যাতে অধিক সহায়-সহযোগিতা পায়।”
“কেবখন অনা সত্ত্বেও অসমৰ মানুহে বিজেপিক ভোট দিলে। যদিও কেবৰ বিৰুদ্ধে বহুত আন্দোলন হ’ল, তথাপি বিজেপিক মানুহে কিয় ভোট দিলে?” নিজৰ চৰকাৰী আৱাসত দিয়া সংবাদমেলখনত প্ৰশ্ন প্ৰাক্তন মুখ্য মন্ত্ৰী তৰুণ গগৈৰ।
