কংগ্ৰেছৰ গৰাখহনীয়াত নহয়, বৰাক-ব্ৰহ্মপুত্ৰত কিমান গৰাখহনীয়া হৈছে তাতহে চৰকাৰখনে দৃষ্টি দিয়ক: দেৱব্ৰত শইকীয়া
বাক্সাৰ তামুলপুৰৰ ৰাজীৱ ভৱনত মঙলবাৰে উপস্থিত হৈ কংগ্ৰেছ নেতা দেৱব্ৰত শইকীয়াই কেইবাটাও গুৰুত্বপূৰ্ণ মন্তব্য কৰে।
উপ- নিৰ্বাচনৰ পৰিপ্ৰেক্ষিতত তামুলপুৰৰ ৰাজীৱ ভৱনত উপস্থিত হয় উপ নিৰ্বাচনৰ বিশেষ দায়িত্ব লাভ কৰা দেৱব্ৰত শইকীয়াই।
সংবাদ মাধ্যমৰ আগত দেৱব্ৰত শইকীয়াই মন্তব্য কৰে যে কংগ্ৰেছ দল বিগ জিৰো নহয়। বৰাক-ব্ৰহ্মপুত্ৰত কিমান গৰাখহনীয়া হৈছে চৰকাৰখনে তাতহে দৃষ্টি দিয়ক। কংগ্ৰেছ দলৰ গৰাখহনীয়াত দৃষ্টি দি তেওঁলোকৰ লাভ নাই।
কংগ্ৰেছ দলৰ দলীয় সিদ্ধান্ত মৰ্মে উপ নিৰ্বাচনত তামুলপুৰত কংগ্ৰেছ দলে প্ৰাৰ্থী প্ৰদান কৰিব বুলি তেওঁ সদৰী কৰে।
তেওঁ লগতে কয় যে মোদীৰ দল স্বৈৰাচাৰী ভ্ৰষ্টাচাৰ দল। সেই কাৰণে আগন্তুক সময়ত দলটোৰ পতন ঘটিব।
‘’২০২৬ বৰ্যত ৰাইজৰ দল আৰু জাতীয় পৰিষদৰ সৈতে লগ লাগি আমি বিজেপি বিৰোধী চৰকাৰ গঠন কৰিম,’’-শইকীয়াই কয়।
শইকীয়াই লগতে কটাক্ষ কৰি কয় যে বিজেপিৰ ভাল দিনৰ সংজ্ঞা হ’ল মিঠাতেলৰ মুল্য দুশ টকা, পেট্ৰ’লৰ দাম এশ টকা, ডিজেলৰ দাম পচানব্বৈ টকা।
তেওঁ মন্তব্য কৰি কয় যে মানুহৰ মন মেচিনেৰে ভগৱানে বনাই নপঠায়। দুই এটা অমিল থাকিব পাৰে।
আনহাতে, তেওঁ প্ৰশ্ন কৰে যে মেঘালয়ৰ মন্ত্ৰীয়ে অসমত গো- সুৰক্ষা আইন প্ৰণয়নৰ সময়তে গো মাংস অধিক ভোজন কৰিব লাগে বুলি কোৱা কথাই কি বুজায়?