আগন্তুক লোকসভা নিৰ্বাচনত প্ৰতিদ্বন্দ্বিতা কৰিবলৈ আগ্ৰহী কেইবাজনো কংগ্ৰেছ নেতাই আজি ৰাজীৱ ভৱনলৈ গৈ টিকট বিচাৰি নিজৰ নিজৰ আৱেদন দাখিল কৰিছে। গুৱাহাটী, বৰপেটা, তেজপুৰ, লখিমপুৰ, ধুবুৰী আদি কেইবাটাও সমষ্টিৰ পৰা আজি প্ৰাৰ্থিত্ব প্ৰয়াসীয়ে টিকট বিচাৰে।
দলটোৰ বাবে আটাইতকৈ প্ৰত্যাহ্বান ভৰা সমষ্টি গুৱাহাটীত টিকট বিচাৰি আৱেদন জনালে দলটোৰ এগৰাকী আগশাৰীৰ নেত্ৰী ববিতা শৰ্মা আৰু জ্যেষ্ঠ নেতা তথা দলটোৰ ৰাজ্যিক সাধাৰণ সম্পাদক, জ্যেষ্ঠ মুখপাত্ৰ ৰমেন বৰঠাকুৰে। আজি দুয়োজনে ৰাজীৱ ভনত নিজৰ নিজৰ আৱেদন দাখিল কৰে।
ৰাজীৱ ভৱনৰ পৰা ওলাই আহিয়ে সংবাদ মাধ্যমৰ আগত ববিতা শৰ্মাই তেওঁক দলে টিকট দিয়াৰ ক্ষেত্ৰত আশাবাদী বুলি কৈ কয়, মহিলা হিচাপে তেওঁক দলে অগ্ৰাধিকাৰ দিব। সমষ্টিটোৰ বৰ্তমানৰ সাংসদ বিজয়া চক্ৰৱৰ্তীৰ পৰা ৰাইজে কি পালে সেই প্ৰশ্ন উঠাবলৈ তেওঁ ৰাইজক আহ্বান জনায়।
ইপিনে সমষ্টিটোৰ পৰা প্ৰাৰ্থিত্ব প্ৰয়াসী জ্যেষ্ঠ নেতা ৰমেন বৰঠাকুৰে আৱেদন দাখিল কৰিবলৈ লগত লৈ আহে য়ুনিফ’ৰ্ম পৰিহিত ছাত্ৰ-ছাত্ৰীৰ এটা দল। ছাত্ৰ-ছাত্ৰীসকল তেওঁৰ পিছে পিছে শ্ল’গান দি সমদলত যোৱাটো আছিল অত্যন্ত দৃষ্টিকটু।
বৰঠাকুৰে সমষ্টিটোত তেওঁৰ প্ৰতিদ্বন্দ্বীৰ ৰূপত মন্ত্ৰী হিমন্ত বিশ্বক কামনা কৰে বুলি সংবাদ মাধ্যমৰ আগত প্ৰকাশ কৰে। জালুকবাৰী সমষ্টিত বিজেপিৰ পৰা এইবাৰ মন্ত্ৰী হিমন্ত বিশ্ব শৰ্মাই প্ৰতিদ্বন্দ্বিতা কৰিব পাৰে বুলি ওলোৱা খবৰৰ প্ৰসংগত সাংবাদিকৰ প্ৰশ্নত তেওঁ এইদৰে কয়।
নিজৰ ৰাজনৈতিক দক্ষতাৰ নমুনা দাঙি ধৰি যোৱা পঞ্চায়ত নিৰ্বাচনত সমষ্টিটোত দায়িত্বত থাকি ৩০টা সমষ্টিত কংগ্ৰেছৰ সপক্ষে ভোট আদায় কৰিবলৈ সক্ষম হোৱা বুলি দাবী কৰে বৰঠাকুৰে।
আনহাতে বৰপেটাৰ পৰা যোৱা বছৰ দলটোত যোগদান কৰা কমল কুমাৰ মেধিয়ে টিকট বিচাৰিছে। তেওঁৰ উপৰি কোচ ৰাজবংশীসকলৰ প্ৰতিনিধি বিশ্বজিৎ ৰায় আৰু প্ৰাক্তন বিধায়ক আব্দুৰ ৰহিম খানেও প্ৰাৰ্থিত্ব বিচাৰি আৱেদন জনাইছে।
তেজপুৰত টিকট বিচাৰিছে যুৱ কংগ্ৰেছৰ প্ৰাক্তন সভাপতি পাৰ্থপ্ৰতিম বৰাই। যদিও মাত্ৰ এসপ্তাহ পূৰ্বে কংগ্ৰেছত যোগদান কৰা অসম চৰকাৰৰ অৱসৰপ্ৰাপ্ত অতিৰিক্ত মুখ্য সচিব এম জি ভি কে ভানু তেজপুৰৰ পৰা প্ৰাৰ্থিত্ব প্ৰয়াসী বুলি চৰ্চা হৈ আছে, এই পৰ্য্যন্ত তেনে কোনো অগ্ৰগতি চকুত পৰা নাই ভানুৰ ক্ষেত্ৰত।
ধুবুৰীৰ পৰা টিকট বিচাৰিছে দক্ষিণ শালমৰাৰ বিধায়ক ৱাজেদ আলী চৌধুৰী আৰু অসম প্ৰদেশ কংগ্ৰেছৰ লোকসংযোগ বিভাগৰ সাধাৰণ সম্পাদক আশ্ৰাফুল ইচলামে।
লখিমপুৰৰ পৰা টিকট বিচাৰি আৱেদন জনাইছে যুৱ কংগ্ৰেছৰ প্ৰাক্তন সভাপতি জয়প্ৰকাশ দাসে।
উল্লেখযোগ্য যে লোকসভা নিৰ্বাচনৰ টিকট বিচৰি আৱেদন কৰাৰ আজি দ্বিতীয় দিন।
