লকডাউন চলি থকাৰ মাজত বহু দুখীয়া পৰিয়ালে বৰ্তমানলৈকে চৰকাৰে যোগান ধৰা খাদ্য সামগ্ৰী লাভ নকৰা বুলি গুৰুতৰ অভিযোগ উত্থাপন কৰিছে মৰিয়নীৰ কংগ্ৰেছী বিধায়ক ৰূপজ্যোতি কুৰ্মীয়ে।
ইয়াৰ উপৰি, ৰেচন কাৰ্ড থকা পৰিয়ালে যোৱা মাহৰ চাউল লাভ কৰিলে যদিও এপ্ৰিল মাহৰ চাউল লাভ কৰা নাই। সেই চাউল অতি সোনকালে বিতৰণ কৰিবলৈও বিধায়কগৰাকীয়ে আহ্বান জনায়।
উল্লেখ্য যে মঙলবাৰে ৰাজ্য চৰকাৰৰ কেবিনেটে ৰাষ্ট্ৰীয় খাদ্য সুৰক্ষা আইনৰ অধীনত ৰেচন কাৰ্ড নথকা সকলক ১০০০ টকাকৈ দিয়াৰ সিদ্ধান্ত লৈছিল। যিবিলাক গাঁও পঞ্চায়তৰ অধীনত ৫ হাজাৰ জনবসতি আছে সেইবোৰত ১৫০ টা পৰিয়ালে ১০০০ টকাকৈ লাভ কৰিব বা ৫ হাজাৰৰ পৰা ১০ হাজাৰ লোকৰ ভিতৰত ২০০ টা পৰিয়ালে এই সুবিধা লাভ কৰিব বুলি সিদ্ধান্ত লৈছিল।
বিধায়ক ৰূপজ্যোতিৰ মতে এই সিদ্ধান্ত সুনিশ্চিত হোৱা নাই।
এই সন্দৰ্ভত তেওঁ কয় “চৰকাৰে বান্ধি দিয়া নিৰ্দিষ্ট সংখ্যাতকৈ গাঁও পঞ্চায়তসমূহত লোকৰ সংখ্যা ২০, ৩০, ৫০ বা ১০০ টা বেছিকৈও থাকিব পাৰে।”
ৰেচন কাৰ্ড নথকা কোনো দুখীয়া পৰিয়ালে এই ১০০০ টকা লাভ কৰাৰ পৰা যাতে বাদ নপৰে তাৰ বাবে গাঁওবুঢ়া, আশাকৰ্মী আৰু শিক্ষকসকলক ৰেচন কাৰ্ড নথকা লোকসকলক নিৰ্বাচন কৰাত নিয়োগ কৰিবলৈ স্বাস্থ্য মন্ত্ৰীক আহ্বান জনায়।
আনহাতে, স্বাস্থ্য মন্ত্ৰীলৈ অন্য এক আহ্বান জনাই কুর্মীয়ে কয় “এনে পৰিস্থিতিত সকলো ৰাজনৈতিক দলৰে দলপতি আৰু সভাপতি সকলক লগত লৈ স্বাস্থ্য মন্ত্ৰীয়ে এক সৰ্বদলীয় সভা অনুষ্ঠিত কৰিব লাগে।”
বিধায়ক ৰূপজ্যোতি কুৰ্মীয়ে এক পত্ৰৰ জৰিয়তে স্বাস্থ্য মন্ত্ৰীলৈ এই আহ্বান জনায়।
