হোজাই জিলাৰ হোজাই, লামডিং আৰু যমুনামুখ সমষ্টিৰ অন্তৰ্গত মুঠ বাৰখন জিলা পৰিষদত কংগ্ৰেছ আৰু বিজেপিয়ে উন্নত ফলাফল প্ৰদৰ্শন কৰাৰ বিপৰীতে সম্পূৰ্ণৰূপে বিধ্বস্ত হ’ল এ আই য়ু ডি এফ। দলটোৱে মাত্ৰ এটা জিলা পৰিষদ সমষ্টিতে থমকি ৰ’বলগীয়া হোৱাত ৰাজনৈতিক মহলত বিষয়টো চৰ্চিত হৈ পৰিছে।
হোজাই জিলাৰ বাৰখন জিলা পৰিষদৰ ভিতৰত কংগ্ৰেছে ছখন, বিজেপিয়ে পাঁচখন আৰু আই য়ু ডি এফে এখন জিলা পৰিষদ সমষ্টি দখল কৰে। জিলাখনৰ বিধায়ক শিবু মিশ্ৰৰ লামডিং সমষ্টিৰ কাকী আৰু উদালী জিলা পৰিষৰ সমষ্টি কংগ্ৰেছে দখল কৰাৰ বিপৰীতে ৰানীপুখুৰী আৰু লামডিং জিলা পৰিষদ সমষ্টি বিজেপিয়ে দখল কৰে।
লামডিং সমষ্টিৰ জিলা পৰিষদৰ অন্তৰ্গত পূব লামডিং গাঁও পঞ্চায়ত, দক্ষিন লামডিং গাঁও পঞ্চায়ত আৰু পশ্চিম লামডিং গাঁও পঞ্চায়তৰ সভাপতি তথা আঞ্চলিক সদস্য বিজেপিৰ দখলত থকাৰ বিপৰীতে নখুটি গাঁও পঞ্চায়ত সভাপতি তথা আঞ্চলিক সদস্য এ আই য়ু ডি এফে দখল কৰাৰ লগতে খাগৰীজান গাঁও পঞ্চায়ত সভাপতি বিজেপি তথা আঞ্চলিক সদস্য এ আই য়ু ডি এফে দখল কৰিবলৈ সক্ষম হয়।
উল্লেখ্য যে লামডিং সমষ্টিৰ চাৰিখন জিলা পৰিষদৰ ভিতৰত ৯নং কাকী জিলা পৰিষদত জোন্তী বৰাই আৰু ১২নং উদালী জিলা পৰিষদত ইচমাইল আলিয়ে কংগ্ৰেছ দলৰ পৰা জয় লাভ কৰে। আনহাতে ১০নং লামডিং জিলা পৰিষদত ৰিপন কুমাৰ দাসৰ লগতে ১১নং ৰানীপুখুৰী জিলা পৰিষদ মমতা দাসে বিজেপি দলৰ পৰা জয়লাভ কৰে।
সেইদৰে যমুনামুখ সমষ্টিৰ অন্তৰ্গত চাৰিওখন জিলা পৰিষদ ক্ৰমে ডবকা, নীলবাগান, মোৰাজাৰ আৰু চৌধুৰীবজাৰ জিলা পৰিষদ সমষ্টি কংগ্ৰেছে দখল কৰে। হোজাই সমষ্টিৰ ইছলামনগৰ জিলা পৰিষদত এ আই য়ু ডি এফৰ প্ৰাৰ্থী জয়ী হোৱাৰ বিপৰীতে ৰাজবাৰী,পদুমপুখুৰী আৰু ভালুকমাৰী জিলা পৰিষদত বিজেপি প্ৰাৰ্থী জয়ী হয়।
উল্লেখ্য যে আজমলৰ দূৰ্গ হিচাপে খ্যাত যমুনামুখৰ গৰিষ্ঠসংখ্যক পঞ্চায়তৰ সভাপতি আৰু আঞ্চলিক সদস্য পদত কংগ্ৰেছ প্ৰাৰ্থী জয়ী হয়। যমুনামুখ সমষ্টিৰ ১৬টা পঞ্চায়তত কংগ্ৰেছৰ সভাপতি জয়ী হোৱা বিপৰীতে অগপৰ ৩ জন, এ আই য়ু ডি এফৰ ২ জন, নিৰ্দলীয় ২ জন আৰু বিজেপিৰ এজন পঞ্চায়ত সভাপতি নিৰ্বাচিত হয়।
সমষ্টিটোত কংগ্ৰেছৰ ২০ জন আঞ্চলিক সদস্য/সদস্যা নিৰ্বাচিত হোৱাৰ বিপৰীতে অগপৰ ২ জন আৰু এ আই য়ু ডি এফৰ ২জন জয়ী হয়।
মন কৰিবলগীয়া যে দীৰ্ঘদিন ধৰি এ আই য়ু ডি এফৰ দখলত থকা যমুনামুখৰ গৰিষ্ঠ সংখ্যক পঞ্চায়ত এইবাৰ কংগ্ৰেছৰ দখলত যোৱাত সমষ্টিটোত এ আই য়ু ডি এফৰ ভেটি উছন হোৱাটোৱে ইংগিত বহন কৰে। বিগত সময়ত এ আই য়ু ডি এফৰ প্ৰাৰ্থীৰ কোটি কোটি টকাৰ দুৰ্নীতিৰ বাবে এইবাৰ ৰাইজে পঞ্চায়ত নিৰ্বাচনত উচিত শিক্ষা দিয়া বুলি সৰ্বত্ৰে চৰ্চিত হৈছে।
