কেৰালাৰ ৱায়নাড ভূমিস্খলনত ক্ষতিগ্ৰস্ত এশৰো অধিক পৰিয়ালৰ বাবে কংগ্ৰেছে নতুন ঘৰ নিৰ্মাণ কৰিব। শুকুৰবাৰে এই কথা ঘোষণা কৰে লোকসভাত বিৰোধী দলৰ নেতা তথা ৱায়নাডৰ প্ৰাক্তন সাংসদ ৰাহুল গান্ধীয়ে। তেওঁ কয় যে, “কেৰালাই ইমান ডাঙৰ দুৰ্যোগ কেতিয়াও দেখা নাই। তিনিটা বৃহৎ ভূমিস্খলনত ২৭৫ জনতকৈ অধিক লোকৰ মৃত্যু হয়। বহু লোক গৃহহীন হৈ পৰিছে।”
শুকুৰবাৰেও ৰাহুলে সাহায্য শিবিৰ পৰিদৰ্শন কৰি ভূমিস্খলনৰ ফলত অসহায় হৈ পৰা পৰিয়ালসমূহক সাক্ষাৎ কৰে। তেওঁৰ সৈতে উপ-নিৰ্বাচনত ঘোষিত কংগ্ৰেছ প্ৰাৰ্থী প্ৰিয়ংকাও উপস্থিত থাকে। ৰাহুলে কয় যে, বৃহস্পতিবাৰৰ পৰা আমি অবিৰতভাৱে ভূমিস্খলন ক্ষতিগ্ৰস্ত অঞ্চললৈ গৈ আছোঁ। ক্ষতিগ্ৰস্ত পৰিয়ালৰ লগতে স্থানীয় প্ৰশাসন আৰু পঞ্চায়ত প্ৰতিনিধিৰ সৈতে কথা পাতোঁ। ১০০ৰো অধিক ক্ষতিগ্ৰস্ত পৰিয়ালৰ ঘৰ পুনৰ নিৰ্মাণৰ দায়িত্ব ল’ব কংগ্ৰেছে।
৩০ জুলাই (মঙলবাৰ)ত ধাৰাসাৰ বৰষুণৰ বাবে এই ঘটনা সংঘটিত হয়। যাৰ কাৰণে চুডালমালা, মুণ্ডক্কাই, আট্টামালা, নুলপুঝা আদি গাঁওবোৰ গুৰুতৰভাৱে ক্ষতিগ্ৰস্ত হৈছে। বৃহস্পতিবাৰে ৱায়নাডত উপস্থিত হৈ ৰাহুল-প্ৰিয়ংকাই বৰষুণৰ মাজতে ভূমিস্খলন ক্ষতিগ্ৰস্ত অঞ্চল পৰিদৰ্শন কৰে। দৃশ্যমানভাৱে আৱেগিক ৰাহুলে কয়, “এই ঘটনা মোৰ বাবে মোৰ পিতৃৰ মৃত্যুতকৈ অধিক যন্ত্ৰণাদায়ক।”
প্ৰসংগক্ৰমে এইবাৰৰ লোকসভা নিৰ্বাচনত ৰাহুলে উত্তৰ প্ৰদেশৰ ৰায়ে বৰেলীৰ লগতে ৱায়নাডৰ পৰা তিনি লাখতকৈ অধিক ভোটৰ ব্যৱধানত জয়লাভ কৰে। ইয়াৰ পূৰ্বে ২০১৯ চনৰ লোকসভা নিৰ্বাচনত ৰাহুলে উত্তৰ প্ৰদেশৰ আমেথিৰ পৰা পৰাস্ত হৈছিল যদিও কেৰালাৰ ৱায়নাডত জয়ী হৈছিল ৰাহুল। কিন্তু এইবাৰ তেওঁ ৰায়ে বাৰেলীৰ আসন এৰি ৱায়নাডৰ সাংসদ পদৰ পৰা পদত্যাগ কৰে। কংগ্ৰেছে উপ-নিৰ্বাচনত সেই আসনৰ প্ৰাৰ্থী হিচাপে ঘোষণা কৰিছে প্ৰিয়ংকাক।
