এনডিএৰ সৈতে মিত্ৰতা ছেদ কৰি কংগ্ৰেছ-আৰজেডিৰ সমৰ্থনত গঠন কৰা বিহাৰৰ নীতিশ কুমাৰ চৰকাৰত কংগ্ৰেছে তিনিটা মন্ত্ৰীপদ লাভ কৰিব। দেওবাৰে কংগ্ৰেছৰ এজন জ্যেষ্ঠ নেতাই এই কথা সদৰী কৰে। এআইচিচিৰ ৰাজ্যিক পদাধিকাৰ ভক্ত চৰণ দাসে কয় যে কংগ্ৰেছৰ দুজন বিধায়কে ১৬ আগষ্টত মন্ত্ৰী হিচাপে শপত ল’ব।
তাৰ পিছত পৰৱৰ্তী কেবিনেট সম্প্ৰসাৰণ হ’লে আৰু এজন বিধায়কক অন্তৰ্ভুক্ত কৰা হ’ব।তেওঁ কয় ” বিহাৰৰ মহাগোটবন্ধন চৰকাৰত কংগ্ৰেছে লাভ কৰিবলগীয়া মন্ত্ৰীপদৰ সংখ্যা চূড়ান্ত কৰা হৈছে। কংগ্ৰেছে মুঠ তিনিটা মন্ত্ৰীপদ লাভ কৰিব,” । কংগ্ৰেছৰ দুজন বিধায়কে ১৬ আগষ্টত শপত গ্ৰহণ কৰিব।
১৬ আগষ্টৰ পিছত পৰৱৰ্তী সম্প্ৰসাৰণ হ’লে নীতিশ কুমাৰ মন্ত্ৰীসভাত আৰু এজন কংগ্ৰেছ দলৰ বিধায়কক অন্তৰ্ভুক্ত কৰা হ’ব। দাসে কয় যে কোন মন্ত্ৰী হ’ব সেই বিষয়ে কংগ্ৰেছৰ বিধায়কসকলে এতিয়াও সিদ্ধান্ত লোৱা হোৱা নাই। তেওঁ কয় ” আমি সোমবাৰে নীতিশ কুমাৰ মন্ত্ৰীসভাত যোগ দিবলগীয়া আমাৰ বিধায়কসকলৰ নাম চূড়ান্ত কৰিম” ।
ইয়াৰ পূৰ্বে কংগ্ৰেছৰ সূত্ৰই ইংগিত দিছিল যে দলটোৱে নতুন চৰকাৰত চাৰিটা মন্ত্ৰীপদ বিচাৰি আছে। বৰ্তমান কেৱল মুখ্যমন্ত্ৰী আৰু উপ-মুখ্যমন্ত্ৰী তেজস্বী যাদৱক লৈ গঠিত কেবিনেটখন ১৬ আগষ্টত সম্প্ৰসাৰণৰ সম্ভাৱনা আছে। নীতিশ কুমাৰে বুধবাৰে শপত গ্ৰহণ কৰিছিল। জেডি(ইউ)য়ে বিজেপি নেতৃত্বাধীন এন ডি এৰ সৈতে সম্পৰ্ক ছিন্ন কৰাৰ পিছদিনা চৰকাৰ গঠনৰ বাবে আৰজেডি, কংগ্ৰেছ আৰু আন কিছুমান দলৰ সৈতে হাত মিলাইছিল।
বৰ্তমান মহাজোঁটত সাতটা দল আছে – জেডি(ইউ), আৰজেডি, কংগ্ৰেছ, চিপিআইএমএল(এল), চিপিআই, চিপিআই(এম) আৰু এইচএএম। এই দলকেইটাৰ সন্মিলিতভাবে ২৪৩ জনীয়া বিধানসভাত ১৬০ জনতকৈও অধিক বিধায়ক আছে।
