দেশৰ প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহ সম্পৰ্কত ফেচবুকত অসন্মানজনক প’ষ্ট শ্বেয়াৰ কৰা কাছাৰ জিলাৰ এগৰাকী কংগ্ৰেছ কৰ্মীক বৃহস্পতিবাৰে আৰক্ষীয়ে আটক কৰিছে।
জানিব পৰা মতে, যোৱা ১৭ মে’ত শিলচৰৰ কংগ্ৰেছ আই টি চেলৰ কৰ্মী আবিৰ চৌধুৰীৰ বিৰুদ্ধে বিজেপিৰ যুৱ মৰ্চাই এজাহাৰ দাখিল কৰিছিল। বৃহস্পতিবাৰে আৰক্ষীয়ে আবিৰ চৌধুৰীক আটক কৰি জেৰা চলায়।
আই টি এক্টৰ অধীনত ঘৰৰ কাষৰ পৰাই আটক কৰা কংগ্ৰেছ কৰ্মী আবিৰ চৌধুৰীৰ মোবাইল ফোনটোও জব্দ কৰা হৈছে।
অৱশ্যে প্ৰাথমিক জেৰাৰ পাছত কংগ্ৰেছ কৰ্মীগৰাকীক যাবলৈ দিয়া হয় যদিও আৰক্ষীয়ে বিচাৰিলেই হাজিৰ হ’ব লাগিব বুলি কোৱা হৈছে।
কাছাৰৰ বিজেপি যুৱ মৰ্চাৰ নেতা অমিতেশ চক্ৰৱৰ্তীয়ে এই সন্দৰ্ভত কয়, ‘’অপৰাধীসকলৰ সৈতে প্ৰধানমন্ত্ৰী তথা গৃহমন্ত্ৰীক তুলনা কৰা, তেওঁলোকক ভাইৰাছ বুলি তুলি ধৰা কথাটো মানি ল’ব নোৱাৰি। নীতি-আদৰ্শক সমালোচনা কৰা আৰু প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহক ছচিয়েল মিডিয়াত অপমান কৰাৰ মাজত এটা পাৰ্থক্যৰ সীমাৰেখা থকা উচিত। অভিযোগৰ পাছত আৰক্ষীয়ে তেওঁক আটক কৰাৰ বাবে আৰক্ষীলৈ ধন্যবাদ।‘’
আনহাতে, শিলচৰ কংগ্ৰেছৰ মুখপাত্ৰ জ্যোতিন্দ্ৰ দেই কয় যে আৰক্ষীয়ে তেওঁলোকৰ কৰ্তব্য কৰিছে। ইয়াক লৈ আমাৰ একো ক’বলগীয়া নাই। কিছুমান বাতৰিৰ লিংক শ্বেয়াৰ কৰাৰ বাবেই যদি গোচৰ তৰা হয় তেতিয়াহ’লে ই সুস্থ গণতন্ত্ৰৰ লক্ষণ হ’ব নোৱাৰে।
তেওঁ অভিযোগ কৰি কয় যে সেই লিংকৰ সৈতে চৌধুৰীয়ে একো লিখাও নাছিল। চৰকাৰে এইটো বুজাব খুজিছে নেকি যে শাসক দলৰ বিৰুদ্ধে কোনোবাই সমালোচনা কৰিলেই তেওঁ জে’লত যাব লাগিব?
